Kreu i Policisë së Shtetit ka firmosur disa ndryshime dhe emërime të reja në drejtimin e Drejtorive Vendore të Policisë, duke sjellë lëvizje të rëndësishme në disa qarqe të vendit.
Vilson Bala është emëruar Drejtor i Drejtorisë Vendore të Policisë Korçë. Ai zëvendëson në këtë detyrë Uljan Shpatarakun, i cili është përmendur në media për ushtrim presioni dhe shantazhi në Peqin, me qëllim sigurimin e votave në favor të një kandidateje të Partisë Socialiste, Sara Mile. Shpataraku është gjithashtu i lidhur me akuza për kontakte me grupe kriminale.
Vilson Bala ka mbajtur më herët detyrën e drejtorit të Operacionales dhe është i njohur për publikun si personi që arrestoi ish-presidentin Ilir Meta, duke e nxjerrë me forcë nga makina.
Emri i Balës ka qenë gjithashtu në qendër të vëmendjes gjatë vitit 2024, kur ai u mor në pyetje nga Prokuroria e Posaçme Kundër Korrupsionit dhe Krimit të Organizuar (SPAK). Hetimi lidhej me dyshime mbi dekonspirimin e një operacioni policor madhor.
Ky operacion u zhvillua më 31 korrik kundër të ashtuquajturës “banda e vëllezërve Çopja” në Elbasan, në bashkëpunim me Europol, Eurojust dhe agjenci partnere ndërkombëtare. Nga 33 urdhër-arreste të lëshuara nga GJKKO, vetëm 13 u ekzekutuan, duke ngritur dyshime serioze për rrjedhje informacioni të klasifikuar brenda strukturave të Policisë së Shtetit.
Ndërkohë, Islor Islami është caktuar në detyrën e Drejtorit të Drejtorisë Vendore të Policisë Lezhë. Po ashtu, Afrim Tafa është caktuar Drejtor i Drejtorisë Vendore të Policisë Durrës.
Sa i përket Drejtorisë Vendore të Policisë Elbasan, Drejtori i Përgjithshëm i Policisë së Shtetit ka vendosur të revokojë dorëheqjen e Drejtues Fatmir Hoxha. Për rrjedhojë, Hoxha do të vijojë detyrën si Drejtor i Drejtorisë Vendore të Policisë Elbasan.
