Një magazinë në Kamëz, e kthyer në qendër të prodhimit të rrobave të falsifikuara, është zbuluar nga Policia e Tiranës.
Sipas hetimeve, në këtë magazinë futeshin mallra të dyshuara si kontrabandë, të cilat nuk kishin kaluar proceset doganore.
Më pas, mbi to vendoseshin logo të falsifikuara me makineri lazeri, printerë dhe pajisje stampimi, duke i hedhur në treg si produkte origjinale.
Policia arrestoi 46-vjeçarin turk Ozkan Sulun, ndërsa një tjetër shtetas turk, 50-vjeçari Mehmet Karçiga, u shpall në kërkim dhe po kërkohet intensivisht. Tre gra që punonin në magazinë u proceduan penalisht në gjendje të lirë.
Gjatë kontrollit, u sekuestruan veshje dhe këpucë të gatshme për treg, makineri industriale, stampa të markave të njohura si Adidas, Nike, Calvin Klein e të tjera, një celular dhe dokumente që besohet se do të ndihmojnë hetimin.
