Reshjet e dendura të shiut dhe dëborës gjatë natës kanë shkaktuar vështirësi në qarkullim në disa rrugë të vendit. Në disa segmente janë shënuar rrëshqitje dherash, rënie gurësh dhe prezencë uji, duke krijuar rrezik për drejtuesit e mjeteve.
Nga veriu në jug janë raportuar probleme, veçanërisht në zonat malore, ku reshjet kanë shkaktuar bllokime të përkohshme dhe ngushtim të qarkullimit. Në disa akse është lejuar kalimi vetëm me një korsi, ndërsa në të tjera është ndërhyrë për pastrim të inerteve.
Rënie dherash janë shënuar në rrugën Librazhd–Qafë Thanë dhe Skuraj–Peshkopi, ndërsa në zonën Dushaj–Lekbibaj është regjistruar rrëshqitje masive shkëmbinjsh.
Probleme të ngjashme janë raportuar edhe në Korçë–Dardhë, Përmet–Tre Urat dhe Valare–Erind–Çajup, ku në disa segmente qarkullimi është bllokuar përkohësisht.
Në zonat mbi 1100 metra lartësi, reshjet kanë qenë në formë dëbore, duke vështirësuar lëvizjen, veçanërisht në akset Bogë–Theth dhe Hani i Hotit–Vermosh.
