Situata e përmbytjeve në Durrës sot mori një kthesë të rëndë: humbi jetën punonjësi i Ndërmarrjes Komunale Plazh, A.H., i cili dyshohet se u mor nga rrjedha e ujit teksa verifikonte dëmet në terren.
Pas vdekjes dhe dëmeve masive në banesa, biznese, rrugë dhe shërbime, Prokuroria e Durrësit ka regjistruar një procedim penal për shpërdorim detyre, shkatërrim të pronës me përmbytje dhe shkatërrim pronë nga pakujdesia.
Në qendër të hetimit janë hidrovorët që duhej të mbronin qytetin dhe kanë kushtuar 19 milionë euro, por dyshohet se nuk funksionuan në momentin kritik.
Tenderi i kësaj vepre është fituar nga bashkimi i kompanive 2T, Adriatik dhe Vëllezërit Hysa, por veçanërisht kompania Adriatik ka ngjallur dyshimet më të forta:
50% e saj zotërohet nga Petrit Kovaçi
Kovaçi është babai i Spartak Kovaçit, ish-drejtor i Ujësjellës-Kanalizimeve në Durrës, i cili njihet si njeri i afërt me zëvendëskryeministren Belinda Balluku.
Ndërkohë, vetë Balluku, për të cilën SPAK pret autorizimin për arrestim, ka vazhduar me show-t e saj mediatik duke vizituar zonat e përmbytura. Pas Novoselës, Balluku ka shkuar në Gjirokastër, ku ka deklaruar se lumi Vjosa po mbahet nën monitorim.
Po për çfarë monitorimi e ka fjalën “e dyta e vendit”, kur Vjosa ka pushtuar tashmë banesat e disa banorëve?
Ndërkohë që mediat kanë raportuar për dëmtim të paneleve mbrojtëse përgjatë shtrirjes së lumit, deri tani nuk është ndërmarrë asnjë masë për t’i riparuar ose forcuar ato.
Pra, ndërsa qytetarët merren me ujin që u fut në shtëpi dhe humbin edhe jetën nga neglizhenca, zyrtarët mjaftohen me kamera, deklarata dhe “monitorime”.
Ndërkohë, “i pari i vendit”, Edi Rama që vetëm një ditë më parë tha se akuzat për përmbytjet janë të pabaza dhe ka deklaruar disa herë se PS nuk do të lejojë arrestimin e Ballukut shpërndan me krenari deklaratat e saj nga Gjirokastra në faqen e tij në Facebook.
