Në Durrës, një qytetar i është drejtuar emisionit “Stop” në Tv Klan për të denoncuar një rast mashtrimi. Ai tregon se një vit më parë i ka dhënë makinën e tij një shoku për përdorim të përkohshëm. Kur ia ka kërkuar mbrapsht, ka mësuar se automjeti ishte lënë peng për 2500 euro, pa dijeninë e tij. Pavarësisht përpjekjeve për ta gjetur makinën, qytetari nuk ka marrë asnjë informacion konkret për vendndodhjen e automjetit.
Në këto kushte, ai iu drejtua Policisë së Durrësit duke bërë kallëzim penal. Shtetasi që kishte marrë makinën u arrestua, por më pas u la i lirë, ndërsa për automjetin nuk ka asnjë gjurmë.
Në deklarimet e tij, shtetasi R. V., i cili kishte marrë makinën, pranon se e ka lënë peng për 2500 euro duke justifikuar veprimin me nevoja shëndetësore të nënës së tij. Ai pretendon se ka vepruar me mirëbesim dhe se do t’ia kthejë paratë personit të tretë për ta rimarrë makinën. Nga ana tjetër, qytetari e cilëson veprimin si tradhti dhe mashtrim duke deklaruar se nuk i është dhënë asnjë zgjidhje dhe se është detyruar ta denoncojë rastin në polici.
Shtetasi R.V: O vëlla do t’i çoj makinën, do t’i çoj lekët, që ia kam marrë shokut tim për plakën vëlla dhe do t’i çoj makinën, kaq shumë e thjeshtë, mo vëlla. Makina nuk është se ka dokumente, kam marrë unë lekët për nonën time, se kështu është, kur thotë tjetri ta kam falur, ta kam bërë, unë me mirëbesim tani, unë makinën do ta marr prapë se do i çoj lekët burrit të huaj se 2500 euro kam marrë, nuk kam marrë 100 mijë euro. Një muaj unë nuk do isha dhe m’u deshën lekët për plakën, për ilaçet një muaj rresht, isha pa punë dhe ia lashë makinën një shokut tim, i thashë më jep 2500 euro dhe kur të dal, do të jap lekët. Për një makinë 3000 euro, duke më bërë mua kshu.
Qytetari: Jam duke ikur të denoncoj makinën.
Shtetasi R.V: Turp e faqe e zezë t’i bësh këto gjëra, o shok!
Qytetari: Ti s’po më lë zgjidhje, më ço te makina, më ço te makina!
Shtetasi R.V: Po ta bie mo zemra, po ta bie, mo shpirt!
Qytetari: Ti ke pa interesat e tua, të më bëje dhe lojëra mua se kam përdor imazhin tënd, kujt i ha … për imazhin tënd, të kam konsideruar shok, mik, asnjë gjë më shumë.
Shtetasi R.V: Jo, jo s’i ka thënë njëri këto … Dëgjo tani! A të nisem dhe të takoj një çikë?
Qytetari: Pa makinë, mos ec kot!
“Stop” komunikoi edhe me R.V. për të marrë versionin e tij.
Gazetarja: Makinën ku e keni lënë?
Shtetasi R.V: Makinën, më detyrohet zotëria lekët për sa i përket të gjitha publiciteteve që i kam bërë nga Instagrami, pastaj zotëria të marrë atë që i përket. Ajo makina bën 1 milionë lekë njëherë.
Gazetarja: A ke ndonjë kontratë që do i bëje publicitet të këtij lloji, ndonjë marrëveshje?
Shtetasi R.V: As ai s’ka kontratë, që më ka dhënë makinën mua.
Gazetarja: Po mund t’ia jap unë makinën një shoku/shoqeje, por kjo s’do të thotë që e përvetëson.
Shtetasi R.V: Kush tha, që më ka dhënë makinë njëherë?
Gazetarja: Po ju e keni pranuar vetë që jua ka dhënë makinën.
Shtetasi R.V: Ehë!
Gazetarja: Po pyes ku është makina?
Shtetasi R.V: Po lekët e mia ku janë, të reklamave të dy pijeve që ka ai?
Gazetarja: Ke një marrëveshje që do t’i bëje reklamë dhe do të paguheshe me makinën?
Shtetasi R.V: Absolutisht! Po shoqërore, jo atë, na merr këtë se s’ka lekë.
Gazetarja: Pse nuk i ke thënë që nuk do ta kthej, e kam lënë peng?
Shtetasi R.V: S’është e vërtetë fare.
Gazetarja: Makinën e dispononi apo është e vërtetë që është lënë peng?
Shtetasi R.V: Jo nuk është lënë peng, s’ka lidhje. Në qoftë se jep lekët, e merr makinën zotëria.
Gazetarja: Ju po e përdorni makinën?
Shtetasi R.V: Absolutisht jo!
Gazetarja: Po ku e keni lënë?
Shtetasi R.V: Gjithë të mirat, ciao!
Hetimi për gjetjen e automjetit iu besua autoriteteve përkatëse, ndërsa rasti është referuar edhe në Prokurorinë e Durrësit. Sipas oficerit të Policisë Gjyqësore, të gjitha veprimet procedurale janë kryer dhe dosja është përcjellë në prokurori, por deri më tani nuk ka asnjë zhvillim konkret dhe makina vazhdon të mbetet e zhdukur.
Çfarë bëhet ndonjë gjë për makinën?
OPGJ: Për Zotin e madh i kam çuar letrat në prokurori, s’di gjë, ça ka bërë prokurorja, bëra ato detyrat që më pati caktuar ajo mua, ia mbarova të gjitha.
Qytetari: Po kush prokurore e ka se nuk e di?
OPGJ: Ka qenë ajo që ka ikur, nuk e di se kujt i ka rënë, unë ia kam çuar asaj.
Qytetari: Po për makinën është bërë ndonjë gjë?
OPGJ: Jo, jo, sa e pata dosjen unë nuk arrita dot që të gjej gjë, për Zotin! Hajde vëlla!/Tv Klan
