Pavarësisht uljes së nivelit të ujit në disa zona, situata në Qarkun Shkodër vijon të jetë shqetësuese, me probleme të theksuara infrastrukturore dhe pasoja të drejtpërdrejta për banorët e disa bashkive.
Në Bashkinë Shkodër, fshati Bardhaj vazhdon të mbetet i izoluar, ndërsa montimi i urës tip “Bailey” ende nuk ka sjellë zgjidhje konkrete për rikthimin e qarkullimit normal. Në disa zona të tjera, prania e ujit mbetet e dukshme.
Problemet vazhdojnë edhe në Bashkinë Malësi e Madhe. Në fshatin Reze e Vështit, rruga e fshatit është e mbuluar nga uji, duke vështirësuar lëvizjen e banorëve. Ndërhyrjet janë të kufizuara dhe të përkohshme, ndërsa situata mbetet e paqëndrueshme, veçanërisht pranë Përroit të Thatë në fshatin Kamicë, ku rreziku i përmbytjeve përsëritet.
Reshjet e shiut me intensitet të lartë në Bashkinë Fushë Arrëz kanë përkeqësuar ndjeshëm gjendjen e rrugëve rurale. Në njësitë administrative Iballe, Fierzë, Blerim dhe Qafë Mali, vërshimi i ujërave ka dëmtuar rrugët, duke izoluar zona të tëra dhe duke vështirësuar aksesin e banorëve në shërbime bazë.
Në fshatin Obot, Njësia Administrative Ana e Malit, prania e ujit në rrugë arrin rreth 40 cm, një situatë e njohur dhe e përsëritur ndër vite, pa një zgjidhje përfundimtare nga institucionet përgjegjëse.
