Kreu i lëvizjes “Shqipëria Bëhet”, Adriatik Lapaj, ka vijuar edhe sot protestën përpara Kryeministrisë, duke deklaruar se aksioni i tij do të vazhdojë pavarësisht, sipas tij, presioneve dhe masave të marra nga institucionet.
Në fjalën e tij, Lapaj akuzoi policinë e Cërrikut se, sipas tij, ka ushtruar presion dhe ka kërcënuar qytetarë që i janë bashkuar protestës.
Ai deklaroi se deri më tani janë proceduar penalisht 13 persona dhe janë arrestuar katër të tjerë për prishje të rendit dhe qetësisë publike, akuza që, sipas tij, nuk qëndrojnë.
Lapaj shtoi se protestuesit janë akuzuar edhe për dhunë ndaj forcave të rendit, ndërsa ngriti shqetësimin për praninë e personave civilë që, sipas tij, kanë fotografuar qytetarët gjatë protestës.
“Do të vazhdoj të protestoj. Janë 13 të proceduar penalisht dhe 4 të arrestuar për prishje të rendit dhe të qetësisë publike. Po, po erdhe në protestë, do të bërtasësh.
Na kanë akuzuar për dhunë ndaj forcave të rendit. Na fotografuan civilët; ne nuk kemi asnjë kundërshtim që të vijnë forcat e policisë, por jo civilë. Ne nuk e dimë kush janë ata, ndoshta janë përfaqësues të bandave.”, tha Lapaj.
