Një sasi e konsiderueshme lëndësh piroteknike është sekuestruar në Tiranë . Si rezultat, janë arrestuar 3 persona dhe janë proceduar penalisht 9 të tjerë.
Sipas njoftimit, lëndët piroteknike u gjetën në 7 raste të ndryshme, në markete, automjete dhe ambiente të ndryshme, ku dyshohet se tregtoheshin pa leje.
Gjatë kontrolleve, u arrestua një 28-vjeçar, ndërsa një tjetër shtetas u procedua në gjendje të lirë, pasi në automjetin e tyre u gjetën lëndë piroteknike dhe një sasi e vogël kanabisi. Në një rast tjetër, një 22-vjeçar u arrestua pasi në bagazhin e automjetit të tij u gjetën fishekzjarre.
Po ashtu, janë proceduar dy të rinj 18 dhe 20 vjeç, teksa në automjetin e tyre u konstatuan lëndë piroteknike. Në një tjetër rast, një 55-vjeçar u arrestua, ndërsa tre persona të tjerë u proceduan, pasi u konstatuan duke shitur ose blerë fishekzjarre në një market në zonën e “Myslym Ketës”.
Në një tjetër rast, tre shtetas të tjerë u proceduan penalisht pasi iu gjetën sasi fishekzjarresh gjatë kontrollit.
