Shtatë oficerë policie janë plagosur pas një shkëmbimi zjarri me persona të dyshuar si anëtarë të organizatës terroriste ISIS, gjatë një operacioni policor në provincën Yalova, në veriperëndim të Turqisë.
Sipas mediave turke, përfshirë transmetuesin shtetëror TRT Haber, incidenti ndodhi gjatë një bastisjeje në një banesë, ku forcat e sigurisë kishin shkuar për të arrestuar të dyshuarit. Këta të fundit iu përgjigjën thirrjeve për t’u dorëzuar duke hapur zjarr, çka çoi në një përplasje të armatosur.
Operacioni u mbështet edhe nga njësitë speciale të policisë nga qyteti i Bursës, ndërsa zona u rrethua për arsye sigurie.
Autoritetet bëjnë me dije se shtatë efektivët e plagosur janë transportuar në spital dhe ndodhen jashtë rrezikut për jetën.
Hetimet vijojnë për të zbardhur plotësisht rrethanat e ngjarjes dhe për të identifikuar persona të tjerë të përfshirë.
