Qyteti i Vlorës po përballet me një situatë të rënduar në furnizimin me ujë të pijshëm, duke mbetur pa ujë prej më shumë se 48 orësh, pikërisht në ditët e festave të fundvitit.
Shkak i situatës është një defekt në linjën kryesore të transmetimit të ujit. Sipas informacioneve, një ndërhyrje e kryer dy ditë më parë për të rregulluar një problem të vogël teknik ka përfunduar në një avari edhe më të rëndë, pasi tubacioni ka shpërthyer gjatë punimeve, duke e nxjerrë plotësisht jashtë funksionit sistemin e furnizimit.
Burime bëjnë me dije se pjesa e dëmtuar e tubacionit nuk ndodhet në Shqipëri dhe po kërkohet në Selanik, çka ka shtuar pasigurinë për kohën e rikthimit të furnizimit me ujë.
Sipas raportimeve në media, qyteti mund të mbetet pa ujë edhe për disa ditë të tjera.
