Ekonomia amerikane ka njohur një rritje të fuqishme në tremujorin e tretë të vitit , bëri të ditur të martën Departamenti i Tregtisë.
Produkti i Brendshëm Bruto (PBB/GDP) një tregues i gjerë i vlerës së mallrave dhe shërbimeve u rrit me një normë vjetore prej 4.3% gjatë tremujorit të tretë, shumë më lart se parashikimet dhe niveli më i lartë i rritjes në dy vitet e fundit.
Sipas Byrosë së Analizës Ekonomike (BEA), rritja e papritur u nxit nga shtimi i shpenzimeve të konsumatorëve, rritja e eksporteve dhe shpenzimet qeveritare, të cilat u zbutën pjesërisht nga një rënie e investimeve.
Ekonomistët prisnin që ritmi i rritjes të ngadalësohej në 3.2%, nga 3.8% që ishte në tremujorin e dytë.
Në një reagim në rrjetin Truth Social, Trump atribuoi shifrat pozitive tarifave të tij: “TARIFAT janë përgjegjëse për shifrat e SHKËLQYERA të ekonomisë amerikane të sapo shpallura… dhe ato vetëm do të përmirësohen! Gjithashtu, PA INFLACION dhe SIGURI KOMBËTARE E SHKËLQYER. Lutuni për Gjykatën e Lartë të SHBA-së!!! President DJT”, shkroi ai.
Shifrat e GDP-së pritet të ndërlikojnë më tej vendimmarrjen e Rezervës Federale (Fed). Fed njoftoi më herët këtë muaj uljen e tretë të normave të interesit për këtë vit, për shkak të shenjave të dobësimit të tregut të punës, por brenda institucionit ka ndarje mendimesh për hapat e mëtejshëm.
Mandati i dyfishtë i Fed-it është ruajtja e stabilitetit të çmimeve dhe maksimizimi i punësimit. Inflacioni mbetet ende mbi objektivin vjetor prej 2%, çka mbështet argumentin për mbajtjen e normave të interesit të larta, por problemet në tregun e punës sugjerojnë se norma më të ulëta mund të ndihmojnë në frenimin e rritjes së papunësisë.
Vendimmarrja e Fed-it ndërlikohet edhe nga mungesa e të dhënave të plota. Ashtu si raportet e tjera kyçe ekonomike, edhe shifrat e fundit të GDP-së janë vonuar për shkak të mbylljes së qeverisë federale, e cila zgjati nga 1 tetori deri më 12 nëntor dhe përfshiu pezullimin nga puna të punonjësve shtetërorë, përfshirë ata që merren me mbledhjen e të dhënave ekonomike.
Ekonomia amerikane ka treguar qëndrueshmëri në një vit me sfida të jashtëzakonshme. Trump shpalli në prill tarifa të gjera ndaj partnerëve kryesorë tregtarë të SHBA-së dhe, megjithëse disa prej tyre janë zbutur ose tërhequr, pasiguria e krijuar ka tronditur bizneset dhe konsumatorët./CNN
