Kombet e Bashkuara kanë reaguar ashpër ndaj Shteteve të Bashkuara, pasi Uashingtoni vendosi sanksione ndaj dy gjyqtarëve të Gjykatës Ndërkombëtare Penale (GJND), për shkak të hetimeve që kjo gjykatë po zhvillon ndaj Izraelit për krime lufte në Gaza.
Gjyqtarët e sanksionuar, Gotsa Lordkipanidze nga Gjeorgjia dhe Erdenebalsuren Damdin nga Mongolia, kishin votuar këtë javë kundër kërkesës së Izraelit për mbylljen e hetimit të GJND-së mbi krimet e dyshuara të luftës në Gaza.
Sipas OKB-së, ky veprim përbën një përshkallëzim të rrezikshëm të presionit dhe hakmarrjes ndaj institucioneve ndërkombëtare të drejtësisë. Zyra e Komisionerit të Lartë të OKB-së për të Drejtat e Njeriut theksoi se sanksionimi i gjyqtarëve dhe prokurorëve bie ndesh me sundimin e ligjit dhe pavarësinë e drejtësisë ndërkombëtare.
Deri më tani, SHBA ka vendosur sanksione ndaj nëntë gjyqtarëve dhe prokurorëve të GJND-së, të lidhura me hetimet për krimet e dyshuara të luftës të kryera nga Izraeli. Këto masa lidhen drejtpërdrejt me vendimin e GJND-së në nëntor 2024 për të lëshuar urdhër-arreste ndaj kryeministrit izraelit Benjamin Netanyahu dhe ish-ministrit të Mbrojtjes Yoav Gallant, për krime lufte dhe krime kundër njerëzimit.
Sekretari amerikan i Shtetit, Marco Rubio, deklaroi se gjyqtarët e sanksionuar kishin votuar për mbajtjen në fuqi të këtyre urdhër-arresteve, duke justifikuar kështu masat e ndërmarra nga Uashingtoni.
SHBA ka vendosur më herët sanksione edhe ndaj Francesca Albanese, raportuese speciale e OKB-së për të drejtat e njeriut në territoret palestineze të pushtuara, e cila ka akuzuar publikisht Izraelin për gjenocid në Gaza.
