Shteti i Bahamas, në Karaibe, ka njohur zyrtarisht pavarësinë e Kosovës, duke u bërë vendi i 121-të që merr këtë vendim. Lajmi u bë i ditur të premten nga presidentja Vjosa Osmani.
Në një njoftim në rrjetet sociale, Osmani bëri me dije se marrëveshja për njohjen e Kosovës u arrit në Nasau, kryeqytetin e Bahamas. “Edhe një vendim historik për vendin tonë”, shkroi ajo.
Marrëveshja për njohjen e Kosovës dhe vendosjen e marrëdhënieve diplomatike mes dy vendeve u nënshkrua nga presidentja Osmani dhe kryeministri i Bahamas, Philip Davis.
Në një deklaratë të përbashkët, Kosova dhe Bahamas theksuan përkushtimin ndaj parimeve të Kartës së Kombeve të Bashkuara, përfshirë respektimin e sovranitetit, barazinë mes shteteve dhe zgjidhjen paqësore të mosmarrëveshjeve.
Dy vendet u dakordësuan të zhvillojnë marrëdhëniet mbi bazën e respektit të ndërsjellë dhe reciprocitetit, si dhe të thellojnë bashkëpunimin në fusha si tregtia dhe investimet, turizmi, arsimi, kultura, teknologjia dhe inovacioni, si edhe shkëmbimet ndërmjet qytetarëve.
