Detaje të reja kanë dalë në dritë nga shpërthimi me tritol i regjistruar mëngjesin e kësaj të premte në Selitë të Vogël, ku një sasi lënde plasëse shpërtheu në automjetin e shtetasit Dritan Jano.
Burime për mediat bëjnë me dije se 39-vjeçari Dritan Jano, është nipi i Thoma Janos, i cili deri para pak kohësh ka qenë zëvendësprokuror i përgjithshëm për pjesën e përgjimeve.
Nuk dihet nëse tritoli lidhet me postin e xhaxhit të tij, ndërkohë që janë ngritur disa pista kryesore hetimi.
Sipas informacioneve, hetuesit po verifikojnë edhe punën e bashkëshortes se 39-vjeçarit, Dorina Jano e cila rezulton të jetë një nga Administratorët e Agjencisë së Pasurive të Sekuestruara dhe Konfiskuara, në Ministrinë e Brendshme. Ndërsa vetë Dritan Jano prej vitesh është i punësuar në Drejtorinë e Metrologjisë.
Nuk dihet ende se kush janë autorët, ndërkohë vetë Dritan Jano në dëshminë e tij paraprake para hetuesve, ka mohuar të ketë konflikte të hapura ose të ketë pasur debate me ndonjë person.
Rasti është nën hetim nga autoritetet dhe detaje të tjera pritet të dalin në vijim.
