Kryetari i Partisë Demokratike, Sali Berisha, ka akuzuar Edi Ramën, se ka urdhëruar Thesarin e Shtetit që të kryejë një pagesë prej 25 milionë eurosh në favor të kuntit të tij, si pjesë e një tenderi me vlerë totale 75 milionë euro, të lidhur me projektin për “përmirësim të inteligjencës artificiale”.
Sipas Berishës, duke qenë se Agjencia Kombëtare e Shoqërisë së Informacionit (AKSHI) mund të përballet me bllokim apo sekuestrim, kryeministri ka urdhëruar Thesarin dhe Ministrinë e Financave që të kryejnë me urgjencë pagesën e lotit të fundit prej 25 milionë eurosh.
Ky sipas Berishës është akt mafioz dhe Edi Rama duhet të japë dorëheqjen.
“Edi Rama ka urdhëruar dy ditë më parë t’iu paguhen kunatit 25 milionë euro nga tenderi për përmirësimin e inteligjencës artificiale, që është fund e krye një falsitet. Pra, imagjinoni, familja Rama merr për tenderin për përmirësimin e inteligjencës artificiale, se plasi inteligjenca artificiale në Shqipëri, 75 milionë euro.
Dhe duke e ditur se AKSHI mund të bllokohet, sekuestrohet, Rama urdhëron Thesarin, urdhëroi financat t’i disbursojnë me urgjencë lotin e fundit të parave të papaguara, 25 milionë euro nga 75. Përveç këtyre, të dhënat, të cilat ligji i ndalon strikt angazhimin e kompanive të huaja në administrimin e tyre, iu janë ofruar edhe kompanive të huaja. Pra, me një akt që shkel çdo ligj dhe çdo parim, çdo e dhënë personale e çdo shqiptari që ka letërnjoftim apo pasaportë, që ka konto bankare, që ka sigurime shoqërore apo ndihmë ekonomike, të gjitha llojet e të dhënave janë eksportuar në duart e grupeve kriminale në mënyrë që ato të mund të programojnë për interesat e tyre. Edi Rama duhet të japë urgjentisht dorëheqjen”,-është shprehur Berisha.
