Pas drejtoreshës së Agjencisë Kombëtare të Shoqërisë së Informacionit (AKSHI), Mirlinda Karçanaj, nën shoqërimin e policisë, në ambientet e SPAK ka mbërritur edhe zëvendësdrejtoresha e AKSHI-t, Hava Delibashi.
Edhe Delibashi ndodhet nën masën e sigurisë “arrest në shtëpi”, e njëjta masë e vendosur edhe për Karçanajn, në kuadër të hetimeve të Prokurorisë së Posaçme për një dosje të rëndë që lidhet me manipulimin e tenderave publikë të AKSHI-t.
Mirlinda Karçanaj u paraqit më herët në GJKKO me makinë policie, e shoqëruar nga avokati i saj.
Kujtojmë se të martën, më 16 dhjetor, SPAK dhe Byroja Kombëtare e Hetimit (BKH) goditën një grup të dyshuar kriminal, i cili sipas prokurorisë manipulonte procedurat tenderuese të AKSHI-t përmes kërcënimeve, dhunës dhe pengmarrjes.
Bazuar në kërkesën e SPAK, GJKKO caktoi 8 masa sigurimi. Masë “arrest me burg” është vendosur për Ergys Agasin dhe biznesmenin Ermal Beqiraj, ndërsa masat “ndalim për të dalë jashtë vendit” janë caktuar për Erion Ismailin, Andis Papën, Gëzim Hoxhën dhe Rogers Rrytën.
Sipas hetimeve, grupi kriminal dyshohet se ka rrëmbyer për disa orë biznesmenin Gerond Meçe, duke e detyruar përmes kërcënimeve të tërhiqej nga ankimet për disa procedura tenderuese. Prokuroria pretendon se, me ndihmën e drejtuesve të AKSHI-t, kriteret e tenderave përshtateshin në mënyrë të tillë që favorizonin kompanitë e Ermal Beqirajt, ndërsa dyshohet gjithashtu për pastrim të miliona eurove të përfituara nga fondet publike.
LEXO EDHE:
Hetimet për tenderat e AKSHI-t, Mirlinda Karçanaj paraqitet në GJKKO e shoqëruar nga policia
