Kreu i partisë “Mundësia”, Agron Shehaj, ka reaguar ndaj përgjimeve të publikuara nga Sali Berisha, ku zëvendëskryeministrja Belinda Balluku shfaqet duke diskutuar me Evis Berberin për tenderat e Unazës së Madhe.
Në një deklaratë publike, Shehaj tha se bisedat e publikuara tregojnë se vendimmarrja reale për tenderat nuk bëhet nga Balluku apo vartësit e saj, por nga vetë kryeministri Edi Rama. Sipas tij, përgjimet e SPAK nxjerrin në pah se procedurat formale janë thjesht fasadë dhe se vendimet merren politikisht.
Shehaj citoi pjesë nga biseda ku Balluku i kërkon llogari Berberit për hapjen e një tenderi, ndërsa ky i fundit i përgjigjet se ishte ndarë në disa pjesë për t’u dhënë më shumë operatorëve. Sipas Shehajt, në bisedë përmendet edhe emri i kryeministrit Rama, çka sipas tij tregon se ai ka rol kyç në vendimmarrje.
“Donit përgjime kur del vetë Edi Rama..ja ku i keni. Këto janë përgjimet e SPAK ku del që vendimet i merr Rama. Belinda Balluku duke folur me Berberin i thotë “Për këtë flet ky se ka rënë dakord me Ramën”. Praktikisht i kërkon logari Berberit dhe i thotë “Ti e ke hapur këtë tenderin për të cilin ky thotë se ka rënë dakord me Ramën”.
“Po” i thotë Berberi. “Po si është e mundur që unë nuk di gjë”? Por, thotë Berberi, se ishte një tender i madh, e ndava në shumë pjesë që të merrnin të gjithë. Këto janë përgjimet që tregojnë se vendimet për tenderat nuk i merr as Belinda Balluku dhe as Berberi, por vetë Edi Rama.
Çdo gjë tjetër është thjesht një teatër, nuk ka rëndësi KVO, kriteret, renditja sipas pikëzimeve apo cila është oferta më e mirë. E rëndësishme është që Rama të vendosë se kush prej biznesmenëve që janë afër tij të marrin para e të fitojnë tendera. Është e qartë që Belinda Balluku ka ikur, nuk e shpëtojnë dot më por tani radhën e ka Rama. Duhet të merret i pandehur dhe të dalë para drejtësisë.”, tha ai në një videomesazh në rrjetet sociale.
