Dy shoferë shqiptarë të një furgoni që udhëtonte nga Shqipëria drejt Italisë janë arrestuar nga autoritetet italiane, pasi u kapën duke transportuar armë automatike dhe municione të fshehura në bagazhet e mjetit.
Operacioni u krye në Monfalcone të Triestes, pranë pikës kufitare të Sant’Andrea, nga Guardia di Finanza dhe Policia Ekonomike dhe Financiare (GICO). Furgoni, në të cilin udhëtonin gjithsej pesë pasagjerë, të gjithë shtetas shqiptarë, ishte futur në territorin italian përmes Sllovenisë, pasi kishte kaluar më herët nga pika kufitare e Hanit të Hotit.
Sipas autoriteteve italiane, gjatë kontrollit të dokumenteve, dy shoferët shfaqën sjellje të dyshimta, si nervozizëm dhe tension, çka i shtyu efektivët të kryenin një kontroll më të detajuar të automjetit dhe bagazheve.
Dyshimet u përqendruan te një valixhe me peshë të pazakontë. Gjatë hapjes së saj, policia zbuloi të fshehura mes kapakut dhe shtresës së brendshme tre pushkë automatike “Kallashnikov” (AK-47). Kontrolli i mëtejshëm i automjetit çoi në gjetjen edhe të dy armëve të tjera të të njëjtit lloj, si dhe pesë karikatorë me gjithsej 356 fishekë.
Armët dhe municionet u sekuestruan, së bashku me telefonat celularë të dy shoferëve. Ata u arrestuan në flagrancë për shkelje të ligjit italian mbi kontrollin e armëve (Ligji nr. 895/1967).
Autoritetet italiane njoftuan se kanë nisur hetime të thelluara për të identifikuar rrjetin e furnizimit dhe destinacionin përfundimtar të armëve. Hetimet po zhvillohen në bashkëpunim me autoritetet shqiptare, të cilat, sipas mediave italiane, kanë arrestuar në zonën e Hotit personin e dyshuar si përgjegjës për nisjen e armëve drejt Italisë.
