Një operacion i gjerë i Departamentit të Narkotikëve të Nëndrejtorisë së Ndjekjes dhe Hetimit të Krimit në Janinë çoi në sekuestrimin e një sasie të konsiderueshme droge dhe arrestimin e tre shtetasve shqiptarë, mes tyre një grua që po udhëtonte me fëmijën e saj 2-vjeçar.
Mjeti fuoristradë u pikas në aksin kombëtar Janinë–Kozan, ku drejtuesja shqiptare nuk iu bind urdhrave të policisë për të ndaluar.
Duke shfrytëzuar kushtet e vështira atmosferike dhe rrugore, ajo vijoi arratisjen për kilometra të tëra, duke kaluar edhe në zona të Prefekturës së Grevenas. Gjatë ndjekjes, gruaja dy herë goditi qëllimisht automjetet zyrtare, duke u shkaktuar dëme.
Arratisja përfundoi në Vovousa të Janinës, ku forcat e Narkotikëve dhe O.P.K.E. arritën të neutralizonin mjetin dhe të arrestonin të dyshuarit. Gjatë kontrollit, brenda makinës u gjetën 118 pako me marijuanë, me peshë totale 215 kilogramë, të cilat u sekuestruan menjëherë.
Për tre të arrestuarit është ngritur çështje penale për trafik droge, dhunë ndaj punonjësve të policisë, drejtim të rrezikshëm të mjetit, dëmtim të pronës dhe shkelje të ligjit për të huajt.
