Policia e Korçës ka arrestuar dy persona të dyshuar për një seri bastisjesh në biznese të ndryshme të qytetit. Identifikimi i tyre u bë falë pamjeve filmike të kamerave të sigurisë.
Njëri prej të arrestuarve, 28-vjeçari V. I., ishte në kërkim për këto ngjarje dhe më parë i dënuar për vjedhje. Ai akuzohet si autor kryesor i grabitjes së tre televizorëve në një lokal dhe i një shume parash në një furrë buke, në lagjen nr. 7 të Korçës.
Gjatë kontrollit në banesën e shokut të tij, A. Z., i cili ndodhej me masë sigurie “arrest në shtëpi”, policia gjeti një nga televizorët e vjedhur. Ky u sekuestrua në cilësinë e provës materiale.
Sipas hetimeve, dyshohet se mallrat e vjedhura shiteshin në tregun e zi, ndërsa policia po vijon punën për dokumentimin e plotë të veprimtarisë kriminale të tyre.
