Presidenti i Serbisë, Aleksandar Vuçiç, pas kthimit nga Brukseli ka vizituar një bazë ushtarake të vendosur pranë kufirit me Kosovën, duke dhënë mesazhe të forta në një kohë tensioni të shtuar në rajon.
Gjatë vizitës, Vuçiç deklaroi se forcat serbe janë më të përgatitura se kurrë, duke kujtuar mobilizimin e një dekade më parë:
“Mos harroni se kishim personel të mirë në njësi dhe kur ato po përgatiteshin për mbrojtjen e mundshme të popullit tonë në Kosovë, në njësitë speciale kishim mbi 90 për qind reagim, dhe në Kobra 100 për qind,” – tha Vuçiç.
Sipas komunikatës zyrtare të Ministrisë së Mbrojtjes së Serbisë, presidenti ka vlerësuar “ritmet e modernizimit” të ushtrisë dhe ka theksuar se Serbia po përforcon kapacitetet ushtarake me investime të mëdha në pajisje dhe teknologji të reja.
Ai shtoi se vendi synon që në vitet e ardhshme të prodhonte ose të siguronte deri në 70–80 mijë dronë kamikazë, ndërsa procesi i blerjes dhe prodhimit të armëve po përshpejtohet ndjeshëm.
Deklaratat e Vuçiçit vijnë në një klimë të tensionuar në veri të Kosovës, pas paralajmërimeve të përsëritura nga Beogradi për “mbrojtjen e serbëve të Kosovës” dhe reagimeve të ashpra nga autoritetet e Prishtinës dhe partnerët perëndimorë për ruajtjen e stabilitetit në rajon.
