Turistëve nga dhjetëra vende, përfshirë Mbretërinë e Bashkuar, do t’u kërkohet të dorëzojnë historikun e rrjeteve sociale të përdorura gjatë pesë viteve të fundit si kusht për hyrje në Shtetet e Bashkuara, sipas një propozimi të ri të bërë publik nga zyrtarët amerikanë.
Kushti i ri do të zbatohet për shtetasit e vendeve që kanë të drejtë të vizitojnë SHBA-në deri në 90 ditë pa vizë, përmes programit ESTA (Electronic System for Travel Authorization). Deri më tani, ky sistem kërkonte vetëm të dhëna bazë personale dhe një pagesë prej 40 dollarësh, por sipas dokumentit të ri, turistët do të duhet të japin edhe informacion për:
rrjetet sociale të përdorura në 5 vitet e fundit,
numrat e telefonit dhe adresat e emailit të përdorura në 5–10 vitet e fundit,
si dhe të dhëna shtesë për anëtarët e familjes.
Propozimi u depozitua nga Dogana dhe Mbrojtja Kufitare (CBP) dhe Departamenti i Sigurisë Kombëtare (DHS) në Regjistrin Federal, revistën zyrtare të qeverisë amerikane.
Sipas analistëve, masat e reja mund të sjellin pengesa për vizitorët e huaj dhe të ngjallin shqetësime për privatësinë dhe të drejtat dixhitale. Megjithatë, administrata e Presidentit Donald Trump e justifikon nismën si pjesë e përpjekjeve për “mbrojtjen e Shteteve të Bashkuara nga kërcënimet e jashtme dhe terroristët e huaj”.
SHBA-të pritet të presin një numër të lartë turistësh vitin e ardhshëm, me organizimin e Kupës së Botës 2026 (bashkë me Kanadanë dhe Meksikën) dhe Lojërave Olimpike 2028 në Los Angeles — çka e bën masën edhe më të debatueshme në prag të këtyre ngjarjeve të mëdha ndërkombëtare.
