Si i ftuar nderi në përvjetorin e 10-të të themelimit të “Fundjavë Ndryshe”, kryeministri Edi Rama u shfaq mes duartrokitjeve në një ngjarje që në pamje të parë dukej si një festë e solidaritetit dhe punës humanitare.
Por pas lavdeve që i thuri drejtuesit të fondacionit, Arbër Hajdarit, Rama nuk ngurroi t’i kujtojë edhe “origjinën politike” të tij
“Nuk i kam numëruar sa herë kam dalë në këtë skenë për kongrese, por asnjëherë nuk ma ka marrë mendja që do të ndodhte të dilja përpara një ‘kongresi’ jo të një pale, por të të gjitha palëve, dhe për këtë dua të falënderoj Arbrin. Arbri kishte bërë një klip prekës, për hir të së vërtetës, por kishte lënë pa treguar të vërtetën për zanafillën e historisë sonë të përbashkët, sepse duke dashur të mbetet konsensual, e ka fshehur nga biografia që jetën, kur doli nga duart e Çimit, e ka filluar si anëtar i FRESH-it, dhe unë nuk kam asnjë rrugë tjetër përveçse t’jua kujtoj biografinë. E kam takuar në një festë që organizonte FRESH-i dhe ky ishte jashtë te dera,” – tha Rama
Si person që shpesh i ka qëndruar në krah, Rama e ka shpërblyer Arbër Hajdarin. Hajdari përmes programit “Shqipëria 1 euro” ka marrë në zotërim pronën e një ish-reparti ushtarak depo me nr. 5011 me sipërfaqe 16 214 m2 dhe sipërfaqe ndërtim 3138 në Brar të Tiranës e cila ka qenë në përgjegjësi administrimi të Ministrisë së Mbrojtjes, me afat 20 vjet. Por jo vetëm kaq.
“Dhurata” e parë nga Rama për Arbër Hajdarin daton më 13 mars të vitit 2019 ku me anë të Vendimit të Këshillit të Ministrave u miratua lidhja e kontratës së qirasë me tarifën “1 euro” për një truall funksional dhe objekt me vendndodhje në Brar të Tiranës, me sipërfaqe të përgjithshme 43 169, shkruan Boldnews.
Më 29 korrik të vitit 2020 sërish me anë të Vendimit të Këshillit të Ministrave, miraton shembjen e katër objekteve me qëllim final dorëzimin e kësaj sipërfaqe shtetërore në administrim të fondacionit “Fundjavë ndryshe”, sërish në zonën e Brarit në Tiranë.
