Kryeministri Edi Rama ka zhvilluar një videomesazh në Facebook, ku ka folur edhe për ankimin në Kushtetuese për pezullimin e Belinda Ballukut.
Rama i ka mëshuar sërish idesë së tij që shkarkimi i krahut të tij të djathtë konsiderohet shkelje e palejueshme nga Komisioni i Venecias. Ndërkohë, opozita është shprehur se Rama ka keqinterpretuar qëllimisht referencat nga Komisioni i Venecias dhe Gjykata e Strasburgut.
Gjithashtu, “Boldnews.al” kreu një verifikim mbi opinionet ndër vite të Komisionit të Venecias, nga ku rezultoi se NUK ka asnjë raport apo qëndrim që citon kryeministri Rama.
Për më tepër, falë hulumtimit, rezultoi se qëndrimi i deklaruar nga Rama nuk është aspak i “Venecias”, por i aplikacionit “ChatGPT”.
Në një “opinion” të aplikacionit “ChatGPT” për këtë temë thuhet se: “Çdo vendim për pezullim/shkarkim të ministrave, prek drejtëpërdrejtë balancimin e pushteteve dhe standardet ndryshojnë nga vendi në vend…”.
Pra, duket qartë se ajo që Rama ia atribuon Komisionit të Venecias, në fakt është një lloj sinteze e “ChatGPT”.
Por, aplikacioni, ndryshe nga Rama, në përmbledhjen e tij për këtë temë, është shumë më i saktë dhe më konkret. “ChatGPT”, në bazë të informacionit që përpunon, arrin në përfundimin se: “Nuk ekziston një Opinion publik dhe zyrtar i Komisionit të Venecias që vlerëson apo lejon,- si rregull- pezullimin e ministrave nga detyra”.
“Është një betejë institucionale gjyqësore për të mos lënë atë që nga Komisioni i Venecias konsiderohet shkelje e palejueshme mes kufirit ndarës të pushteteve. Nuk i bëj presion askujt. Unë flas për publikun dhe për balancën mes pushteteve të pavarura në Shqipëri. Duke i hapur rrugë presioneve politike ndaj qeverisë, do të kishim diçka që është e panjohur. Mjafton të parafytyrosh çfarë dëmesh do kishte nëse do lejohej kjo…”, tha Rama sot.
Kujtojmë se gjatë podcast-it të tij “Flasim”, Rama u shpreh se sipas Komisionit të Venecias, gjykatat nuk duhet të pezullojnë anëtarë të qeverisë. Kjo pasi, një gjë e tillë sipas tij do të cënonte balancën e pushtetetve.
LEXO EDHE:
Mashtrimi/ Rama përdor një “opinion të ChatGPT” si “Opinion të Venecias” për të “mbrojtur” Ballukun
