Deputeti i Partisë Demokratike, Ivi Kaso, mbajti sot një fjalim gjatë protestës së opozitës përpara Kryeministrisë, ku akuzoi qeverinë Rama për kapje të shtetit, keqqeverisje dhe mbrojtje të korrupsionit në nivelet më të larta.
Në nisje të fjalës së tij, Kaso solli në kujtesë deklaratën historike të presidentit amerikan Ronald Reagan, i cili më 1981 tha se “qeveria nuk është zgjidhja, por problemi”. Sipas tij, kjo thënie sot është edhe më e vlefshme për Shqipërinë.
“Qeveria sot është halli më i madh i shqiptarëve. Nuk kemi një qeveri të popullit, prej popullit, për popullin, por një bandë kaçakësh që ndjekin urdhrat e kryekaçakut,” deklaroi ai.
Duke iu referuar çështjes së pezullimit nga detyra të ministres Belinda Balluku, Kaso theksoi se Rama po mashtron publikun kur thotë se ministrat nuk mund të pezullohen nga drejtësia.
Ai solli shembuj nga vendet europiane, ku ministra janë pezulluar ose shkarkuar kur kanë qenë nën hetim. “Në Rumani u pezulluan tre ministra për korrupsion. Në Itali ish-ministrja e bujqësisë u pezullua. Në Francë, dy ministra u shkarkuan në periudha të ndryshme. Kjo është e vërteta,” u shpreh ai.
Deputeti demokrat akuzoi kryeministrin se duke refuzuar shkarkimin e Ballukut, në fakt po mbron vetëm veten. “Rama e di se me arrestimin e Ballukut, më pas është radha e tij. Rama është shefi i atyre që janë nën hetim apo pas hekurave. Ose i di dhe është i korruptuar, ose nuk i di dhe është i mangët nga mendtë e kokës në të dyja rastet duhet të ikë,” tha Kaso.
