Nors Manlapaz, nëna e 23-vjeçarit Mark Samson, të akuzuar për vrasjen e ish-të dashurës së tij, Ilaria Sula, është dënuar me dy vite burg pasi akuzohet për pastrim të gjurmëve.
Ajo akuzohet se ka ndihmuar të birin në fshehjen e kufomës së 22-vjeçares shqiptare.
Sipas mediave të huaja, dy ditë më parë, gjyqtari miratoi marrëveshjen e pranimit të fajësisë, duke i dhënë Manlapaz një dënim me kusht, ndërkohë që seanca paraprake për gjyqin e Mark Samsonit është caktuar të nisë më 9 dhjetor.
Familja e Ilarias ka reaguar ashpër ndaj vendimit. Flamur Sula, babai i Ilaria Sulës, e quajti vendimin “të padrejtë” dhe theksoi zhgënjimin e madh që ndjeu për mënyrën sesi u zhvillua gjyqi:
“Për ne, kjo nuk është drejtësi. Ne u shkatërruam nga ajo që pamë dhe dëgjuam, një gjyq që zgjati vetëm pesë minuta. Një person që pastroi litra gjak të vajzës sime, që ishte hedhur në tualet… Për ne, kjo nuk është drejtësi.”
Vendimi ka ngjallur reagime të forta në opinionin publik, duke nxjerrë në pah shqetësimet për mënyrën si trajtohen rastet e ndërlidhura me krimet e dhunshme dhe përfshirjen e të afërmve të autorëve në mbulimin e krimeve.
Seanca e ardhshme e gjyqit të Mark Samsonit pritet të sjellë detaje të reja mbi ngjarjen tragjike dhe të vendosë mbi përgjegjësinë e tij për vrasjen e Ilaria Sulës.
