Një 29-vjeçar nga Puka është arrestuar nga policia, pasi transporte me varkë drejt Tropojës një sasi droge, eksploziv dhe municion luftarak.
Shtetasi L. P., 29 vjeç, banues në Pukë, u kap në flagrancë në fshatin Dushaj, duke lëvizur me një automjet “Volkswagen”, ku kishte fshehur lëndën narkotike dhe eksplozivin.
Sipas policisë, droga dhe municioni dyshohet se ishin transportuar fillimisht me varkë përmes liqenit nga fshati Apripë, Pukë, deri në Tropojë, ku automjeti ishte lënë për të shmangur kontrollin e policisë.
Si rezultat i këtij operacioni u sekuestruan:
1.2 kilogramë kanabis,
405 gram tritol,
51 kapsolla detonatore,
5 metra fitil zjarrpërcjellës,
municion luftarak,
dhe një sasi lekësh.
“Sekuestrohen 1.2 kilogramë lëndë narkotike kanabis, 405 gram tritol, 51 kapsolla detonatore, 5 m fitil zjarrpërcjellës, municion luftarak, si dhe një sasi lekësh. Shërbimet e DVP Kukës, në bashkëpunim me shërbimet e Komisariatit të Policisë Tropojë dhe me mbështetjen e shërbimeve të Forcës së Posaçme “Shqiponja”, bazuar në informacionet e siguruara në rrugë operative se një shtetas do të transportonte drejt Kosovës një sasi lëndë narkotike dhe lëndë eksplozive, organizuan dhe finalizuan operacionin policor të koduar “Varkëtari”.
Si rezultat i këtij operacioni u arrestua në flagrancë shtetasi L. P., 29 vjeç, banues në Pukë. Ky shtetas u kap në flagrancë nga shërbimet e Policisë, në fshatin Dushaj, duke lëvizur me automjetin tip “Volksëagen”, në të cilin kishte fshehur në brendësi të bagazhit lëndën narkotike, eksplozivin dhe municionin luftarak, të cilat dyshohet se i kishte transportuar me varkë nëpërmjet liqenit, nga fshati Apripë, Pukë, deri në Tropojë, ku kishte parkuar automjetin me qëllim shmangien e kontrollit të Policisë. Në bashkëpunim me Prokurorinë dhe me homologët e Kosovës vijon puna për zbardhjen dhe dokumentimin e plotë ligjor të këtij rasti, me qëllim identifikimin dhe kapjen e personit që do t’i blinte në Kosovë,” njoftoi policia.
