Kreu i Partisë Demokratike, Sali Berisha, ka republikuar deklaratën e kryeministrit Edi Rama ditën e sotme, lidhur me pezullimin e zv.kryeministres Belinda Balluku.
Berisha akuzon Ramën për presion ndaj Gjykatës Kushtetuese dhe për shpërndarje të informacionit të pavërtetë për raportin e Komisionit të Venecias.
Sipas Berishës, ministrja Diella ka mohuar ekzistencën e ndonjë raporti të Venecias për pezullime ministrash, duke theksuar se ekzistojnë vetëm raporte për çështje të zgjedhjeve vendore. “Kush po gënjen publikun? Diella apo Rama?”, pyet kreu i PD-së në postimin e tij në rrjetet sociale.
Berisha e cilëson deklaratën e Ramës si një tentativë për të mbuluar aferën e tunelit të Llogarasë dhe për të ushtruar presion mbi Kushtetuesen, duke vënë në pikëpyetje transparencën dhe ligjshmërinë e vendimeve qeveritare.
Ndërkohë, gjatë podcast-it të tij “Flasim”, Rama u shpreh se sipas Komisionit të Venecias, gjykatat nuk duhet të pezullojnë anëtarë të qeverisë. Kjo pasi, një gjë e tillë sipas tij do të cënonte balancën e pushtetetve.
Postimi i Berishës
Të dashur miq,
Edi Rama sot, në avokatinë e tij të turpshme të vjedhjeve të tij me Lubi Ballukun në tunelin e Llogarasë dhe në një presion të hapur ndaj Gjykatës Kushtetuese, ju tha shqiptarëve se Komisioni i Venecias është shprehur kundër pezullimit të ministrave nga detyra.
Kurse Diella thotë se nuk ka asnjë raport të Komisionit të Venecias për pezullime ministrash – konkret, as në tërësi – por ka raporte vetëm për të zgjedhur vendor.
Pyetja ime është: kush gënjen?
Diella apo Rama?
Apo kujt t’i besojmë: Diellës që është e paanshme, apo Ramës të zhytur gjer në vesh në aferën e pistë të tunelit të Llogarasë?”, shkruan Berisha.
