Shtetasi i huaj J.A.C.S, pas një dënimi në Shqipëri prej 3 vitesh e 4 muaj, e ka përfunduar kohën në burg, por nuk është kthyer dot në Honduras, sepse pasaporta dhe telefoni, që iu sekuestruaran gjatë procedurave, nuk i janë kthyer.
Prej më shumë se një muaji, ai mbahet në qendrën e mbyllur për të huajt, të cilën ai e përshkruan si “më e rëndë se burgu”, pasi vuan nga sëmundja HIV/AIDS. Nga Prokuroria është vënë në dispozicion urdhri i ekzekutimit për kthimin e sendeve personale, përfshirë pasaportën.
Për zbatimin e urdhrit është ngarkuar Drejtoria Vendore e Policisë Tiranë, e cila, sipas të dhënave, nisi të lëvizë vetëm pas interesimit të gazetares së “Stop”.
Përgjegjësi i qendrës së mbyllur, nuk jep shpjegime për moskthimin e pasaportës. Ndërsa zëdhënësi i Policisë së Shtetit thotë se çështja është marrë në shqyrtim dhe është caktuar oficeri, që ka shkuar në Prokurori për ekzekutimin e vendimit.
Tashmë, raportohet se dokumentacioni për largimin e tij drejt Hondurasit është përgatitur dhe është siguruar një leje kalimi nga përfaqësia e Hondurasit në Romë. Në datën 10 dhjetor, J.A.C.S do të kthehet në Honduras.
/Emisioni STOP
