Kreu i Zyrës së Presidentit të Ukrainës, Andriy Yermak, ka dhënë dorëheqjen pas kontrolleve të kryera nga Byroja Kombëtare Kundër Korrupsionit (NABU) në ambientet e tij. Lajmi u konfirmua nga presidenti Volodymyr Zelensky, i cili tha se vendimi synon të shmangë spekulimet në një moment kur vendi po përballet me një prej skandaleve më të mëdha të korrupsionit gjatë mandatit të tij.
Zelensky u shpreh mirënjohës për Yermakun, duke theksuar rolin e tij në negociata dhe pozicionin e pandryshuar patriotik. Presidenti paralajmëroi se nesër do të nisë konsultimet për emërimin e kreut të ri të Zyrës së Presidentit.
Dorëheqja vjen ndërkohë që hetimet po shtrihen ndaj figurave të larta të qeverisë. NABU ka akuzuar më herët tetë persona të përfshirë në një skemë korruptive të lidhur me kompaninë shtetërore bërthamore Energoatom. Mes tyre, hetuesit identifikuan Timur Mindich, një nga bashkëpunëtorët më të afërt të Zelenskyt, si organizator kryesor të aferës. Mindich është larguar nga Ukraina dhe është shpallur në kërkim.
Skandali ka sjellë edhe shkarkimin e Ministrit të Drejtësisë Herman Halushchenko dhe Ministres së Energjisë Svitlana Hrynchuk, megjithëse ata nuk janë akuzuar zyrtarisht.
Sipas Ukrainska Pravda, Yermak dyshohet të ketë pasur rol në këtë skemë, dhe hetuesit thuhet se i referohen atij me pseudonimin “Ali Baba”. Prokurorë të posaçëm bëjnë me dije se ai dyshohet se ka ndikuar në presionet ndaj agjencive të zbatimit të ligjit për të goditur detektivët e NABU dhe prokurorët antikorrupsion.
Një burim nga organet e rendit ka pohuar për Kyiv Independent se një vilë luksoze pranë Kievit, e financuar përmes aferës së Energoatom, ishte planifikuar të përdorej pikërisht për Yermakun.
