Policia e Casertas në rajonin e Napolit ka arrestuar një shtetas shqiptar, i dyshuar për trafik droge. Sipas autoriteteve italiane, ai merrej me shpërndarjen e hashashit dhe marijuanës në zona të ndryshme të provincës.
Pas hetimeve të kryera kryesisht në zonën e Capua-s, policia u informua se një automjet me ngjyrë të errët, i drejtuar nga shqiptari, përdorej për transportimin e sasive të mëdha të lëndëve narkotike.
Për këtë arsye u organizua një operacion i posaçëm, që çoi në ndalimin e makinës dhe arrestimin e shoferit, i cili rezultoi i njohur më herët për vepra kundër pronës.
Gjatë kontrollit, në bagazhin e automjetit u gjetën 10 kilogramë drogë – 5 kg hashash dhe 5 kg marihuanë. Sipas policisë italiane, lënda narkotike ishte e paketuar dhe e gatshme për shpërndarje.
