Një 48-vjeçar është arrestuar nga Policia e Tiranës, pas një operacioni kundër shpërndarjes së drogave të forta në zonat periferike të kryeqytetit.
Gjatë kontrollit në vendin e quajtur “Nënkalimi i Marqinetit”, policia ndaloi një automjet ku ndodheshin dy persona.
Në flagrancë u arrestua Sh. D., 48 vjeç, banues në Kamëz, i dyshuar për veprën penale “Prodhim dhe shitje të narkotikëve”. Bashkë me të u ndalua edhe R. K., 41 vjeç, banues në Domje, i dyshuar për “Moskallëzim krimi”.
Nga kontrolli i mjetit dhe banesës së 48-vjeçarit, policia sekuestroi një sasi lënde narkotike të dyshuar kokainë, dy peshore elektronike si dhe automjetin me të cilin lëviznin të dy të arrestuarit.
Hetimet paraprake tregojnë se 48-vjeçari siguronte lëndën narkotike, e ndante në doza dhe e shpërndante në zonën e Vorës. Materialet procedurale i janë referuar Prokurorisë së Tiranës për veprime të mëtejshme.
