Presidenti i Partisë së Lirisë, Ilir Meta, në një intervistë për “Syri.net”, ka lëshuar akuza të forta ndaj Kryeministrit Edi Rama në lidhje me çështjen e pezullimit të Belinda Ballukut.
Meta deklaron se mënyra si është menaxhuar rasti Balluku tregon qartë, sipas tij, se pas çdo afere qëndron vetë Rama. Ai akuzon Kryeministrin për vetëmbrojtje politike dhe përdorim të drejtësisë si instrument pushteti, ndërsa paralajmëron se skandali i Tunelit të Llogarasë dhe aferat e tjera nuk mund të fshihen më pas figurave të ministrave.
Intervista:
Pyetje: Z. Meta, si e konsideroni kërkesën e Qeverisë drejtuar Gjykatës Kushtetuese kundër vendimit të GJKKO, për pezullimin e Znj. Belinda Balluku nga Zv. Kryeministre dhe Ministre e Infrastrukturës dhe Energjisë?
Meta: Vetëm si vetëmbrojtje personale për të ardhmen e tij nga Edi Rama.
Fakti që zonja Balluku është marrë e pandehur zyrtarisht nga vetë SPAK-u i Ramës për vepra të dyshuara në ministrinë e saj, do kërkonte një zgjidhje politike ose nga Znj. Balluku përmes dorëheqjes deri sa të përfundonte gjykimi, ose përmes lirimit nga detyra të saj nga vetë Kryeministri, krijuesi i SPAK-ut me 69 vota.
Fakti që Znj. Balluku nuk ka dhënë dorëheqjen, supozoj se lidhet me bindjen e saj se regjizori i vërtetë i tenderave të paracaktuar, që nga Tuneli i Llogarasë pa ura e plot të tjerë, është vetë Edi Rama.
Jo më kot ish-Zv/Kryeministri Ahmetaj u shpreh për aferën e Tunelit të Llogarasë, se ky është rasti kur Rama ha kumbulla e dardha pas shpinës së Znj. Balluku.
Dhe nuk duhet të harrojmë se Z. Ahmetaj ka qenë denoncuesi i parë i aferës së Tunelit të Llogarasë edhe si dëshmitar okular i takimit në Turqi, bashkë me Ramën dhe Znj. Balluku me kompaninë që do shpallej fituese.
Pyetje: A tregon ky rast se SPAK-u i ka dalë nga kontrolli Ramës?
Meta: Absolutisht jo.
Sot Rama ka 83 (+3) mandate vetëm falë keqpërdorimit të SPAK-ut kundër liderave të opozitës, por edhe mosveprimit ndaj krimit zgjedhor dhe krimit të organizuar, dy shtyllave ku mbështetet ky Narkoregjimi.
Për Ramën paprekshmëria e tij personale dhe e këtyre dy shtyllave që garantojnë tjetërsimin e vullnetit të qytetarëve janë vendimtare.
Lidhur me emra të veçantë si Saimiri, Erjoni, Arbeni, Belinda, etj. as nuk i bëhet vonë fare, se ai ka natyrën e akrepit që e ka ves dhe kënaqësi të thumbojë pabesisht cilindo që i rri pranë dhe i shërben.
Edhe ato çështje të krimit të organizuar që kanë përparuar, janë kryesisht meritë e partnerëve europianë, të cilët i kanë nisur për të mbrojtur interesat e tyre së pari.
Kjo është edhe arsyeja përse tani kërkojnë nga Shqipëria pjesën e tyre të parave që janë investuar në Shqipëri nga krimi i organizuar.
Fakti që 250 fletë-arreste flenë në sirtarët e SPAK-ut dhe Narkopolicisë, tregon qartë sundimin e krimit dhe jo të ligjit në këtë vend.
Meta ka komentuar edhe deklaratat e Komisioneres Kos për zgjedhjet e manipuluara të 11 majit. “Epidemia Soros ka sjellë një nivel të lartë degradimi dhe korruptimi në institucionet e BE”, është shprehur Meta.
Pyetje: Së fundi, Komisionerja për Zgjerimin, Znj. Kos, jo vetëm lavdëroi Shqipërinë për çeljen e kapitujve, por dhe vlerësoi maksimalisht zgjedhjet e 11 Majit, ndryshe nga raporti i OSBE-ODIHR-it. Si e komentoni?
Meta: Para një dekade një politikan i madh italian më ka thënë se dikur punët shkonin mirë në botë se SHBA kishte fuqinë dhe Evropa kishte trurin dhe burra të mëdhenj shteti.
Unë kam patur fatin të punoj me shumë prej tyre.
Por dua t’ju veçoj, nisur nga pyetja e juaj, një përvojë që kam patur me Z. Chris Patten, i cili ka qenë Komisioneri edhe për zgjerimin i BE.
Takimet me të ishin shumë të vështira, sepse jo vetëm niveli i përgatitjes së tij për çështjet konkrete ishte shumë i kualifikuar, i saktë dhe konkret, por edhe integriteti i tij ishte shumë i lartë.
Në përpjekje për të zbutur qëndrimet e tij ndaj disa fenomeneve shqetësuese një politikan i lartë i kishte shprehur bujarinë për t’i ofruar mundësinë që të kishte ndonjë vilë në jug të Shqipërisë meqenëse ai ishte shprehur me superlativë për bukuritë e bregdetit tonë.
Një diplomat i yni që merrej me integrimin më thotë mua që janë keq punët se është ndjerë i fyer Z. Patten, i cili i kishte thënë ekipit të tij se a nuk e dinte ai politikani shqiptar se Chris Patten kishte qenë guvernatori i Hong Kongut?
Tani kohët kanë ndryshuar shumë dhe kriteret e Kopenhagenit përmenden përherë e më pak.
Epidemia Soros ka sjellë një nivel të lartë degradimi dhe korruptimi në institucionet evropiane fatkeqësisht.
Sorosifikimi i të majtës evropiane është një proces i përmbyllur, por fatkeqësisht tentakulat e tij janë shtrirë edhe më gjerë, duke minuar parimet mbi të cilat u themelua Evropa e Bashkuar.
Besoj se e keni ndjekur reagimin e BE ndaj planit të Presidentit Tramp për paqen në Ukrainë së fundmi.
BE deklaroi me forcë ruajtjen e sovranitetit dhe integritetit të Ukrainës dhe pse një pjesë e madhe sot e saj është e pushtuar dhunshëm nga Rusia.
Pra BE, me të drejtë, kërkon mosndryshimin e kufijve dhe ne jemi dakord me këtë.
Pyetje: Por, nga nisi ideja për ndryshimin e kufijve të Kosovës, e cila është në zemër të vetë BE?
Meta: Nuk besoj se keni harruar se kjo nisi fatkeqësisht nga Brukseli, ku u bënë edhe negociata për një kohë të gjatë, derisa lançimi publik i tyre tronditi kancelaritë kryesore në Berlin, Londër etj.
Natyrisht që kjo ide ishte e sponsorizuar nga Soros dhe fondacioni i tij në Serbi.
Kishte detajuar dhe projektin përkatës bashkë me studimin e fizibilitetit. Apo harruat?
Ndërsa negociatorja e ndryshimit të kufijve tani vjen në Tiranë e jep leksione për Europën e Bashkuar!
Është kjo BE, që nën ndikimin e Sorosit, imponoi ndryshime Kushtetuese në Maqedoninë e Veriut për të garantuar zgjedhje të ndershme përmes garantimit të Qeverisë Teknike, 100 ditë para mbajtjes së tyre.
Ndërsa këtu, në mes të ditës, përmbysin edhe raportin e OSBE-ODIHR-it.
Por ky nuk është më problemi ynë, pra standardet e dyfishta të BE.
Problemi ynë është madhor dhe ekzistencial si shoqëri, si shtet, por edhe si komb.
A do të jetojmë të lirë dhe si shqiptarë të vërtetë me dinjitetin tonë njerëzor dhe identitetit tonë kombëtar, apo do tregojmë se e meritojmë këtë Qeveri kuislinge të Xhorxh Sorosit, e cila guxoi të miratojë me 77 kukullat e saj edhe ligjin antifamilje.
Unë jam i bindur se e ardhmja u përket guximtarëve dhe patriotëve dhe jo mercenarëve shqipfolës.
Asnjëherë gjërat nuk kanë qenë dhe janë të lehta për patriotët por ata janë të tillë sepse janë të pathyeshëm, të papërkulshëm dhe të paepur për të sakrifikuar për idetë dhe idealet e tyre, që janë të pavdekshme.
Nuk ka pushtet të përjetshëm, por ka ide të përjetshme siç është Shqipëria e lirë dhe sovrane.
