Lojtarët e Kombëtares, Juljan Shehu dhe Qazim Laçi kanë gjetur rrugën e rrjetës sot me klubet e tyre respektive.
Shehu shënoi golin e vetëm të ekipit të tij, Widzew Lodz, në humbjen 1-3 ndaj Korona-s.
Ky ishte goli i pestë i Shehut në Ekstraklasa-n polake për këtë sezon, ku numëron edhe katër asisite. Ai ka edhe një gol në Kupën e Polonisë.
27-vjeçari ishte lojtari më i mirë në fushë sipas “Sofascore”, i vlerësuar me notën 8.7.
Nga ana tjetër, Qazim Laçi ka përjetuar një pasdite të pazakontë në kampionatin turk, ku skuadra e tij është mundur me shifrat 5-2 nga Fenerbahçe në një sfidë ku mesfushori shqiptar ishte protagonist në të mirë dhe në të keq.
Në startin e ndeshjes, Rizespor gjeti fillimisht rrjetën me anë të ish-sulmuesit të Skënderbeut, Ali Soue, për të kaluar në avantazh.
Më pas, e kishte radhën Laçi që të tregonte talentin e tij, teksa dyfishoi shifrat me një goditje dënimi spektakolare që nuk i la kohë të reagonte portierit Ederson.
Megjithatë, situata do të ndryshonte plotësisht në pjesën e dytë, ku miqtë fillimisht barazuan rezultatin në 2-2, e më pas Laçi pa kartonin e kuq teksa u ndëshkua dy herë me të verdhë brenda 6 minutash dhe la lojën mes protestave për gjyqtarin.
