Në këtë format kemi hasur histori që asnjëra nuk ngjan me tjetrën dhe po ashtu kemi takuar njerëz që padrejtësitë i kanë nga më të ndryshmet. Në këtë episod të Piranjave, sjellim historinë tronditëse të Afërditës, një vajzë që u martua e re, krijoi një familje dhe pak muaj pasi solli në jetë djalin e saj, humbi gjithçka dhe prej vitesh lufton për të drejtën e saj më elementare: të shohë, të përqafojë dhe të rrisë fëmijën e saj…
Gjithçka do të ndryshonte rrjedhën e jetës së saj, më 11 tetor të vitit 2018, kur bashkëshorti i saj u vra në një masakër që do të trondiste vendin në atë kohë.
Siç janë dhe zakonet në veri të vendit, pasi bashkëshorti i ndërroi jetë, ajo mbeti te shtëpia e burrit bashkë me djalin. Në këto ditë të vështira, babai i Afërditës bisedon me krushkun dhe i thotë se pas dyzet ditësh nga vdekja e dhëndrit do ta merrte vajzën bashkë me djalin në shtëpinë e tij, pasi nuk mund të mbeste dhe pa nënë, pasi babain ia vranë. Por këtu do të niste dhe një betejë e ashpër mes dy familjeve, pasi vjehrri i Afërditës nuk pranonte t’ia jepte nipin.
Por pas debateve dhe që gjërat të mos agravonin, Afërdita pranon të largohet nga shtëpia e vjehrrit duke e lënë djalin aty, me shpresën se do të rikthehej ta merrte sa të qetësoheshin gjërat dhe se do të fliste me të në telefon dhe do ta takonte, por asgjë nga këto nuk ndodhi, sepse pasi ajo u largua nga shtëpia, djalin nuk ia nxorrën as në telefon dhe as në takime, duke ndarë kështu djalin nga nëna.
Një ndarje që sot që flasim është në vitin e shtatë. Shtatë vite që, pavarësisht përpjekjeve të saj, vendimeve të gjykatave dhe kallëzimeve në polici, Afërdita nuk mund të jetojë bashkë me djalin. Ky i fundit, sipas dhe raporteve të psikologes, është në gjendje të rënduar psikologjike për shkak të rrethanave ku ndodhet.
Ne shkuam bashkë me nënën për të takuar djalin, por u përballem me të njëjtat vështirësi që Afërdita përballej e vetme, një kalvar i mundimshëm për të takuar fëmijën e saj.
Procedura e kërkon që janë disa data ekzekutimi të njëpasnjëshme. Meqë në ambientet e shtëpisë nuk u ndodh herën e shkuar në ditën 2, përmbaruesi, punonjëset sociale të Bashkisë Mat, policia e qytetit janë mbledhur përsëri me ekzekutim, këtë herë pranë ambienteve të Pallatit të Kulturës Mat, pasi është i vetmi ambient që monitorohet me kamera sigurie.
Sërish Hamiti, gjyshi i të voglit, nxjerr probleme. Këtë herë ne përballemi me të, duke tentuar të marrim një përgjigje se përse nuk e lejon nënën të takojë djalin e saj. Por përballja nuk ishte aq e lehtë, pasi Hamiti ishte i vendosur të mos e lejonte nënën të takohet me djalin, madje duke u shprehur se nuk ka Perëndi që e ndan nga nipi.
Historia vijon… / Piranjat
