Zv.kryeministrja Belinda Balluku është pezulluar nga detyra nga Gjykata e Posaçme e Shkallës së Parë për shkak të hetimeve të nisura nga SPAK për shkelje të barazisë në tendera publikë.
Hetimet kanë nisur fillimisht për dy tendera të mëdhenj: ndërtimin e tunelit të Llogarasë (seksion i autostradës SH8 Vlorë-Sarandë) dhe Unazën e Jashtme të Tiranës, Loti 4. SPAK dyshon se Balluku, në bashkëpunim me anëtarët e komisioneve të vlerësimit, ka favorizuar kompanitë fituese duke krijuar avantazhe të padrejta.
Gazetarja Klodiana Lala është shprehur se Prokuroria e Posaçme ka nisur hetimet edhe për disa tendera të tjerë rrugorë, përfshirë Qukës-Qafë Plloçë, Korçë-Ersekë dhe Thumanë-Kashar.
“Prokuroria e Posaçme ka siguruar dhe ka sekuestruar tendera të ndryshëm që lidhen me rrugën Korçë-Ersekë, Qukës-Qafë Plloçë dhe rrugën Thumanë-Kashar. Po ashtu janë proceduar materiale të tjera tenderuese dhe janë kryer kontrolle në banesa dhe zyra që lidhen me vartës të Ballukut, duke sekuestruar edhe telefonat e tyre,” raportoi Lala.
Në kuadër të hetimeve janë sekuestruar telefona dhe dokumente që lidhen me vartës të Ballukut, ndërsa analiza e materialeve të sekuestruara pritet të japë më shumë informacion mbi lidhjet e saj me këto tendera.
Gjykata ka vendosur, gjithashtu, ndalimin e daljes jashtë shtetit për Ballukun dhe arrest në shtëpi për dy të pandehur të tjerë të përfshirë në procedurat e tenderimeve. Hetimet vijojnë.
