Policia ka arrestuar efektivin, i cili u përfshi në një aksident ditën e sotme në Kamëz. Sipas Agjencisë së Mbikëqyrjes Policore, inspektor F. L., nga Komisariati Nr.5, Tiranë, drejtonte mjetin në gjendje të dehur dhe për pasojë u shkaktuan vetëm dëme materiale.
Kontrolli me testin e alkoolit tregoi një nivel prej 0.91 mg/l.
Më herët në media u raportua se, dy policët që udhëtonin me një automjet tip “Mercedes-Benz” ishin në gjendje të dehur dhe mezi qëndronin në këmbë.
Në kryqëzimin e një rruge ata janë përplasur me një mjet tip “BMW” që drejtohej nga një i ri rreth moshës 22-23 vjeç dhe duke qenë vetë fajtorë dhe në gjendje të dehur, efektivët kanë tentuar ta “zgjidhin” situatën në mënyrë jozyrtare.
Por në ato momente, në vendngjarje ka mbërritur një tjetër patrullë policie, e cila, sipas dëshmitarëve, në vend që të merrte masa ndaj kolegëve të dehur, tentoi t’i mbronte ata.
