Detaje të reja kanë dalë në dritë nga arrestimi i Granit Pepnikajt, mesditën e kësaj të premte, në Dhërmi.
Sipas raportimeve, Pepnikaj, i konsideruar si “koka” e rrjetit të call centerave në Tiranë, akuzohet për përfshirje në një skemë të madhe mashtrimi kompjuterik dhe pastrimi parash.
Ai u lokalizua dhe u ndalua në kompleksin “Olea Residence” në Dhërmi, ku sipas policisë, gjatë kontrolleve janë gjetur dhe sekuestruar një armë zjarri pistoletë, si dhe një sasi lënde narkotike, e dyshuar cannabis sativa.
Po ashtu policia thotë se bashkë me Pepnikajn, janë arrestuar edhe bashkëpunëtorët e tij shtetasit, Xh. H., 31 vjeç dhe R. R., 28 vjeç.
“Mesditën e sotme, në zonën e Drimadhës, u kapën shtetasit G. P., 29 vjeç, dhe Xh. H., 31 vjeç, të shpallur në kërkim.
Shtetasi G. P., 29 vjeç, kërkohej pasi, me vendim të datës 30.04.2026, Gjykata e Tiranës i kishte caktuar masën e sigurisë “Arrest në burg”, si i dyshuar për veprën penale “Mashtrimi kompjuterik”.
Shtetasi Xh. H., 31 vjeç, kërkohej pasi, me vendim të datës 13.04.2026, Gjykata e Tiranës i kishte caktuar masën e sigurisë “Arrest në burg”, si i dyshuar për veprën penale “Mashtrimi kompjuterik”.
Gjatë kontrollit të ushtruar në vilën ku qëndronin, shërbimet e Policisë gjetën dhe sekuestruan një armë zjarri pistoletë, si dhe një sasi lënde narkotike, e dyshuar cannabis sativa.
Në momentin e arrestimit të këtyre shtetasve u kap dhe u arrestua në flagrancë, për veprën penale “Përkrahja e autorit të krimit”, shtetasi R. R., 28 vjeç, banues në Tiranë,- thuhet në njoftimin e Policisë.
Materialet procedurale iu referuan Prokurorisë, për veprime të mëtejshme.
