Në janar të vitit 2022, Policia e Shtetit zhvilloi një operacion në qytetin e Durrësit, duke arrestuar disa persona dhe duke shpallur në kërkim disa të tjerë. Në pranga ranë disa shtetas turq, të cilët e kishin kthyer godinën historike të hotel “Adriatik” në Durrës, në një bazë bixhozi të pa licensuar.
Aksioni i policisë u shfry shumë shpejt, për shkak se kapot ndërhynë në institucionet e tjera ligjzbatuese, teksa zbutën fillimisht akuzat ndaj turqve dhe më pas u fokusuan që të hiqnin nga hetimi edhe pronarët e godinës, Besnik dhe Nevila Duda.
Çuditërisht, nuk pati asnjë akuzë ndaj tyre, teksa koha kaloi dhe pronarët e godinës së hotel “Adriatik” në Durrës filluan të lobonin që të zgjeronin aktivitetin. Tre vite pas atij aksioni policor, familja Duda ka arritur që të marrë një leje rindërtimi për të gjithë zonën.
Sipas dokumenteve që ka siguruar ekskluzivisht VoxNews, godina 68 vjeçare e hoteit do të shkatërrohet, për ti lënë vendin që ndërtese 12 katëshe. Por, çuditë në këtë vendin tonë s’kanë të sosur; përveç shkatërrimit të një historie, në ndërtesën e re do të ketë edhe një kazino!
Duket se pronarët, apo personat që qëndrojnë pas saj, paligjshmërinë e kanë kthyer në ligjshmëri, teksa me lobime dhe lidhje deri në kupolën qeveritare, kanë arritur që të fitojnë edhe licenca për të ushtruar aktivitetin e kazinove.
Ka dyshime të mëdha se të ardhurat nga bixhozi do të përdoren për të ndërtuar godinat e reja, të cilat do të jenë më luksoze dhe më të larta.
Me një të rënë të lapsit, krerët e shtetit kanë shkatërruar një histori të gjatë të egzistencës së saj. Hotel “Adriatik” në Durrës ka qenë një vend pushimi, i ndërtuar gjatë “binjakëzimit” të Shqipërisë më Rusinë. Në atë vend kanë qendruar shumë udhëheqës, madje edhe ata pak diplomatë që vizitonin vendin tonë.
Por, paratë dhe ruspat nuk pyesin për histori. Aq më tepër që në mes është edhe bixhozi, ku paratë nuk mungojnë dhe investohen kryesisht në turizëm dhe ndërtime. Sipas dokumenteve që disponon VoxNews, disa ditë më parë Këshilli Kombëtar i Territorit dhe Ujit ka zbardhur lejen për “miratimin e lejes së zhvillimi për objektin ‘Adriatik Hotel & Residences’, strukturë hotelerie, shërbimesh dhe rezidenca, 1-12 kate mbi tokë dhe 1 kat nëntokë, me vendndodhje në rrugën “Pavarësia”, Bashkia Durrës.
Propozimi për lejen erdhi nga shoqëria “Duda”, me pronar Besnik dhe Nevila Duda. Në dokumente shkruhet se zona për të cilën propozohet ky projekt ndodhet në Durrës, përkatësisht në zonën kadastrale nr. 8518.
“Pozicioni i kompleksit është midis rrugës ‘Pavarësia’ dhe detit, në zonën e plazhit të qytetit të Durrësit dhe historikisht kanë pasur orientim drejt objekteve turistike. Më konkretisht, projekti propozon ri-zhvillimin e hotel ‘Adriatik’, për t’a transformuar atë në një strukturë me cilësi dhe shërbime bashkëkohore. Me origjinë që nga viti 1957, struktura ekzistuese plazhit iu nënshtrua një rinovimi të plotë në vitin 2000” thuhet në dokumente.
Sipas saj, sheshi i ndërtimit ka një sipërfaqe trualli 14.982 m². “Synimi i zhvilluesit DUDA shpk është ndërtimi i një kompleksi të ri turistik me dy ndërtesa kryesore, një ndërtesë me 3 kate lartësi mbi tokë, dhe një ndërtesë të vogël 1 kat në hyrje” vijon dokumenti.
Sipas KKTU-së, ndërtesa do të jetë ndërtesa e re e hotelit me 5 yje “Adriatik”, e konceptuar për të ndërthurur elementet historike të ndërtesës ekzistuese në katet e poshtme me një superstrukturë bashkëkohore në katet e sipërme, ndërsa ndërtesa e pozicionuar në brendësi të sheshit, në anën Jug-Lindore të kompleksit do të jetë ndërtesa e Rezidencave të Branduara.
“Të dy ndërtesat do të lidhen në mënyrë organike nga kati përdhe ku do të jenë shërbimet e gastronomisë, hapësirat e biznesit dhe kazinoja. Nën-tokë do të zhvillohen kryesisht hapësirat teknike, parkimi dhe SPA” vijon dokumenti.
Dokumenti i Këshillit Kombëtar të Territorit dhe Ujit paradoksalisht citon se “Adriatik Hotel & Residences” nuk do të jetë një ndërhyrje që zhduk historinë, por një ringjallje e saj.
“Edhe pse godina ekzistuese e hotel ‘Adriatik’ do të prishet për shkak të amortizimit strukturor dhe mos-përputhjes me standardet bashkëkohore të projektimit të strukturave akomoduese, shpirti i saj arkitektonik do të rikthehet përmes kompleksit të ri që do të realizohet me teknologjitë bashkëkohore të ndërtimit” vijon KKTU-ja.
Sipas saj, projekti parashikon që katet e poshtme të ndërtesës 1-12 kate, të pozicionuar në brendësi të sheshit, buzë detit, në anën Jug-Perëndimore të kompleksit, të rikrijojnë stilin dhe elementet e identitetit të ndërtesës së vjetër – si, silueta, lartësia dhe numri i kateve, proporcioni i hapjeve dhe detajet arkitektonike karakteristike – duke ruajtur lidhjen me peizazhin historik lokal.
Kola kaloi dhe 3 vite pas aksionit të bujshëm, firma dhe pronarët e saj do të ndërtojnë edhe një kazino. Në fakt, rindërtimi do t’i përshtatet më shumë kazinosë, duke qenë se paratë që do të investohen kryesisht janë nga bixhozi.
Mësohet se kompleksi do të jetë një hotel me 5 yje me përvojën ekskluzive të rezidencave të branduara.
“Projekti synon të ofrojë një gamë të gjerë funksionesh dhe aktivitetesh – nga akomodimi cilësor, gastronomia e larmishme dhe hapësirat e biznesit, deri te kazinoja, pishinat dhe zonat e gjelbëruara – duke krijuar një qendër të plotë turizmi, argëtimi dhe relaksi në bregdetin e Durrësit” vijon dokumenti.
Sipas saj, do të ketë 150 dhoma, 110 rezidenca, 42 njësi dnërtesa A dhe 68 ndërtesa B. Do të ketë restorante, bare dhe skybar. Gjithsesi, kryesorja do të jenë sallat e biznesit dhe kazinoja me hyrje të dedikuar./ Vox News
