Deputeti socialist Erion Braçe ka kërkuar një auditim të plotë 10-vjeçar për kontratat e koncesioneve në shëndetësi, pas dyshimeve për pagesa të kryera pa ofruar shërbime në kontratën e hemodializës me Spitalin Amerikan.
Ai tha se, sipas raportit të KLSH për vitin 2023, janë bërë pagesa për 9241 raste nën projeksion dhe 1557 raste mbi projeksion, në total rreth 103 milionë lekë, për shërbime që nuk janë ofruar plotësisht. Braçe kërkoi që KLSH të hetojë të gjitha shkeljet e kontratave gjatë 10 viteve të fundit, për të ndihmuar Ministrinë e Shëndetësisë në vendimmarrje për vazhdimin ose ndërprerjen e shërbimeve.
“Po lexoj nga raporti edhe për vitin 2023 thuhet në të, kontrata koncesionare “Për ofrimin e hemodializës”, ka rezultuar me pagesa për shërbime të pakryera, konkretisht për 9241 raste nën projeksion dhe 1557 raste mbi projeksion, në shumën 103,527 mijë lekë. Këtë gjetje e kam hasur vazhdimisht në vitet, është e njëjta sjellje vit për vit. Cili është rekomandimi që i keni bërë autoritetit përkatës që monitoron këtë kontratë që ka mbaruar praktikisht? Do doja që të kishim një auditim të plotë të 10-viteve të këtyre kontratave, nga dita e parë deri në fund të këtyre kontratave, që të ndihmohet edhe MSH nëse do i zgjasë, ti lë matanë apo të vazhdojë shërbimi publik”, u shpreh deputeti i PS, Erion Braçe.
Kreu i KLSH, Arben Shehu, shtoi se janë konstatuar shkelje të kritereve të financimit, pagesa për shërbime të paplota, mangësi në monitorim dhe raportim të tejkaluar të shpenzimeve. Ai theksoi se shteti duhet të bëjë analiza për rikuperimin e dëmit.
“Për kontratat në shëndetësi kemi kryer veprimet, ua kemi vënë në dispozicion të Kuvendit. Ne jemi shprehur për problematikat, dhe shteti duhet të bëjë një analizë të detajuar për të rikuperuar dëmin brenda afateve të detyrueshme. Në fushën koncesioneve, janë konstatuar shkelje të kritereve të financimit, mangësi në monitorim dhe në vlerësimin e efekteve buxhetore afatgjata. Në disa raste është vijuar me pagesa për shërbime që nuk janë kryer, ose që janë kryer në vëllime më të ulëta se projeksioni. Fenomene të tilla janë vërejtur në kontrata të rëndësishme në fushën e shëndetësisë, ku raportimi i shpenzimeve ka tejkaluar buxhetet e miratuara dhe detyrimet janë likuiduar në kundërshtim me përmbajtjen kontraktore, përfshirë edhe TVSH-në”, shprehet Arben Shehu, kreu i KLSH-së.
Sipas raportit të vitit 2024, KLSH ka kryer 159 auditime dhe 13 kallëzime penale për shkelje të rënda ligjore në fushën e koncesioneve shëndetësore.
