Partia Socialiste dhe Partia Demokratike kanë bashkuar votat në Kuvend për ngritjen e dy komisioneve të posaçme parlamentare: atë për reformën Zgjedhore dhe atë për reformën Territoriale.
Kryetari i PD-së, Sali Berisha, deklaroi se vendimi për të mbështetur ngritjen e komisioneve u mor për dy arsye kryesore. “Janë seri e pafundme e rekomandimeve të ODIHR-it. Rekomandimet e drejta duhet t’i kthejmë në ligj, ndonëse deklarojmë se në mënyrë absolute shqiptarët nuk do të votojnë të lirë me Edi Ramën,” tha Berisha.
Ai shtoi se reforma territoriale e mëparshme ishte një “antireformë” që solli pabarazi mes zonave dhe komuniteteve. “Do bëjmë gjithçka që këto padrejtësi të anulohen,” u shpreh ai, duke nënvizuar angazhimin e opozitës për të rikthyer standardet demokratike në ndarjen territoriale.
