Gjatë një konference për shtyp në selinë e Partisë Demokratike, Sali Berisha ka akuzuar kryeministrin Edi Rama për përpjekje të dështuara për të ndryshuar raportin përfundimtar të vëzhguesve ndërkombëtarë mbi zgjedhjet parlamentare të 11 majit.
Berisha deklaroi se raporti përfundimtar i vëzhguesve ndërkombëtarë konfirmon të gjitha konstatimet e raportit paraprak, duke e cilësuar procesin zgjedhor si një “farsë të vërtetë elektorale”.
Ai tha se përpjekjet e qeverisë shqiptare për të ndikuar në përmbajtjen e raportit, përmes ndërhyrjeve pranë institucioneve të vëzhgimit dhe vetë vëzhguesve, kanë dështuar plotësisht.
“Edi Rama ka zgjedhur heshtjen dhe mashtrimin për të mbuluar dështimin e tij total në ndryshimin e raportit fatal për zgjedhjet e 11 majit,” u shpreh Berisha. “Me kënaqësi të madhe u them shqiptarëve se përpjekjet e tij patën zero efekt.”
Sipas kreut demokrat, raporti evidenton shkelje të parimeve themelore ndërkombëtare të zgjedhjeve, të mishëruara në dokumente si Karta e Kopenhagenit, platforma e Këshillit të Europës dhe Kodi i Venecias.
Fjala e Berishës:
“Edi Rama ka zgjedhur heshtjen dhe mashtrimin për të mbuluar dështimin e tij të plotë dhe total në ndryshimin e raportit fatal për zgjedhjet parlamentare të 11 majit të vëzhguesve ndërkombëtarë.
Siç kisha paralajmëruar, siç kisha paraqitur dokumente zyrtare që faktonin ndërhyrjet brutale të qeverisë shqiptare pranë institucioneve të vëzhgimit dhe direkt vëzhguesve ndërkombëtarë për të ndryshuar termat e përdorura në raportin e tyre për zgjedhjet e 11 majit, janë bërë përpjekje, të cilat me kënaqësi të madhe u them shqiptarëve se patën zero efekt.
Është në meritën më të madhe të institucioneve që vëzhguan zgjedhjet, që i qëndruan fjalë për fjalë të gjitha konstatimeve që faktojnë një farsë të vërtetë elektorale më 11 maj.
Raporti përfundimtar mbështet plotësisht tezat e raportit paraprak se në zgjedhjet e 11 majit u shkelën parimet themelore ndërkombëtare të zgjedhjeve, të mishëruara në Kartën e Kopenhagenit, në platformën e Këshillit të Europës për zgjedhjet, në Kodin e Venecias, në dokumentet më serioze ndërkombëtare për zgjedhjet.
Ato faktojnë se kodi zgjedhor në nenet e tij për përcaktimin e rregullave të fushatave elektorale u thye 4500 herë me evente të ndaluara gjatë fushatës elektorale.
4500 ngjarje, që po t’i llogarisësh, përbëjnë një shumë prej dhjetëra dhe qindra milionë eurosh, të përdorura këto ngjarje vetëm për të ndikuar votën e qytetarëve shqiptarë gjer ditën e fundit 7 milionë euro për organizatën private të Giro D’Italia.”
