Kreu i grupit parlamentar të PS-së, Taulant Balla ishte i pari që mori fjalën sot në Kuvend, ndërsa komentoi kërkesat e opozitës për mocione me debat për disa çështje.
Në fjalën e tij gjatë seancës plenare të ditës së sotme, Balla mbylli hapësirën e debatit në parlament teksa tha se mocionet me debat duhet të fokusohen në një çështje të veçantë dhe jo në një listë të gjatë problematikash.
“Kam para një kërkesë që vjen nga PD-ja, që kërkon jo një çështje të veçantë, por disa qindra çështje; bilancin e qeverisë nga 2013-2025. Në 12 vite kemi bërë aq shumë punë sa nuk dimë çfarë të themi më parë,” deklaroi ai.
Ai shtoi se mazhoranca është e gatshme të zhvillojë mocione me debat për tema që lidhen me procesin e integrimit europian, por jo për një bilanc të përgjithshëm qeverisës.
“Nuk kthehemi dot pas ne, ecim vetëm para. Mund të bëjmë një mocion me debat për çështjet që ndërlidhen me rrugën tonë europiane, me procesin në BE,” tha Balla.
Kërkesa e opozitës për të diskutuar performancën e qeverisë në një periudhë 12-vjeçare përfshinte fusha si ekonomia, drejtësia, arsimi dhe shëndetësia.
Refuzimi i saj ka shkaktuar reagime të ashpra nga ana e deputetëve demokratë, të cilët e kanë cilësuar qëndrimin e Ballës si një përpjekje për të shmangur transparencën dhe llogaridhënien.
