Presidenti i Republikës, Bajram Begaj, ka depozituar një kërkesë zyrtare pranë Gjykatës Kushtetuese, duke kërkuar shpalljen e moskompetencës së saj për shqyrtimin e dekretit presidencial nr. 350, datë 1 tetor 2025, si dhe heqjen e pezullimit të këtij dekreti që ka pamundësuar zhvillimin e zgjedhjeve për Bashkinë Tiranë.
Në dokumentin zyrtar, Institucioni i Presidentit, në cilësinë e palës së interesuar, i kërkon Gjykatës Kushtetuese që në seancën e parashikuar për datën 31 tetor 2025 të marrë këto vendime:
1. Të shpallë moskompetencën për shqyrtimin e dekretit nr. 350, datë 1.10.2025;
2. Të vendosë heqjen e pezullimit të dekretit në fillim të seancës;
3. Të rrëzojë kërkesën e ish-kryetarit të Bashkisë Tiranë, Erion Veliaj, si të pabazuar në nenin 115 të Kushtetutës;
4. Të urdhërojë Komisionin Qendror të Zgjedhjeve për përgatitjen e zgjedhjeve në një datë të re, jo më të hershme se 30 ditë nga hyrja në fuqi e vendimit të Gjykatës Kushtetuese.
Sipas argumentimit të Presidentit, ndërhyrja e Gjykatës Kushtetuese ka cenuar kushtetutshmërinë e procesit ankimor dhe ka bllokuar në mënyrë arbitrare zhvillimin e zgjedhjeve në kryeqytet.
Ai thekson se vetëm një procedim i tillë mund të rikthejë legjitimitetin dhe funksionimin kushtetues të institucioneve.
Gjykata Kushtetuese pritet të shqyrtojë çështjen në seancën e 31 tetorit, ku do të vendosë për fatin e dekretit presidencial dhe vijimin e procesit zgjedhor për Bashkinë Tiranë.
