Nga Boldnews.al
Komisioneri Shtetëror i Zgjedhjeve, Ilirjan Celibashi, deklaron se nuk do të ketë asnjë Marrëveshje me Prokurorinë e Posaçme (SPAK) për monitorimin dhe hetimin e krimeve zgjedhore.
“Ai bashkëpunim (me SPAK) ka ekzistuar edhe para se të formalizohej ashtu sikurse u formalizua më 11 maj dhe me siguri do të vazhdojë. Por ndoshta për shkak të masës në këto zgjedhje, nuk do të jetë e nevojshme për të patur një marrëveshje. Bashkëpunimin e kemi, edhe pas procesit ka vazhduar. Ne shkëmbejmë informacione me të dy strukturat”, deklaroi Celibashi në një komunikim me mediat paraditen e së Premtes.
Celibashi e justifikoi “mungesën” e Marrëveshjes me “masën jo të madhe të votuesve të thirrur në këto zgjedhje”, megjithëse procesi i votimit përfshin një numër të konsiderueshëm bashkish, që do të thotë një numër i lartë votuesish.
Gjithësesi, edhe nëse dy institucionet do të angazhoheshin për një Marrëveshje të re, rezultati nuk do të ishte i ndryshëm nga Akti i përbashkët që nënshkruan Celibashi dhe kreu i SPAK-ut, Altin Dumani, në janar të vitit 2025.
Në fillim të këtij viti, KQZ-ja dhe Prokuroria e Posaçme u zotuan se do të punonin bashkërisht për të identifikur, hetuar dhe vendosjes para përgjegjësisë ligjore të personave që kryenin krime elektorale, përfshirë blerjen e votës, intimidimin e qytetarëve, e të tjerë.
Në funksion të asaj Marrëveshjeje, kreu i SPAK-ut, Altin Dumani, ndërmori një seri takimesh me prokuroritë lokale, ku shpërndu porosi dhe direktiva për të rritur efikasitetin në goditjen e krimeve elektorale.
Zgjedhjet parlamentare të 11 Majit 2025 u shoqëruan me problematika të theksuara dhe me informacione të gjithëanshme për blerje votash nga ana e Partisë Socialiste në pushtet. Këto të dhëna, si rrallëherë më parë, u renditën edhe në Raportin Paraprak të vëzhguesve të OSBE-ODIHR-it.
Por, Prokuroria e Posaçme raportoi vetëm disa kallëzime të bëra kryesisht nga subjekte politikë, ndërkohë që nuk përmendi asnjë hetim të nisur kryesisht. Në përfundim, rezultati hetimor ishte tërësisht skandaloz.
Përveç ndonjë rasti tejet periferik, Prokuroria e Posaçme nuk arriti të zbulonte asnjë shkelje domethënëse elektorale, pavarësisht se pati raportime të shumta për përfshirjen e grupeve kriminale për intimidimin e votuesve. Për më tepër, një pjesë e këtyre grupeve ishin në hetim nga Prokuroria e Posaçme për çështje të tjera, të vrasjeve dhe trafikut të drogës.
Ndaj, si me Marrëveshje, si pa Marrëveshje, KQZ-ja dhe SPAK-u nuk pritet të “ndrisnin” gjë edhe në zgjedhjet e pjesshme vendore, të parashikuara për në 9 nëntor 2025.
