Banorët e zonës Kodër Babrru kanë dalë në protestë kundër kompanisë “Kayo”, e cila planifikon të ndërtojë një fabrikë municionesh në këtë territor. Ata denoncojnë se tokat e tyre po i grabit shteti dhe kompania, pavarësisht se posedojnë dokumente që i bëjnë pronarë legjitimë.
Një nga banorët, Dritan Dervishi, tregon se prona e familjes së tij ka qenë e blerë që në vitin 1929 me napolona ari dhe se ka kaluar si repart ushtarak gjatë komunizmit. “Ja ku i kam dokumentet dhe vulën, prona jonë ka qenë e blerë para se të bëhej repart. Sot shteti po na nxjerr jashtë për interesa të kompanisë Kayo,” thotë Dervishi.
Sipas banorëve, shteti nuk ka informuar qartë nëse prona është futur brenda planit të përhapjes, ndërkohë që dokumentacioni i hipotekës tregon se ata janë pronarë legjitimë. Dervishi thekson se prej disa dekadash nuk kanë mundur të shfrytëzojnë pronën e tyre dhe tani 20 oficera kanë shkuar për ta dorëzuar në emër të kompanisë.
