Nga Boldnews.al
Ministria e Drejtësisë pritet të zhvillojë një takim të Mërkurën e kësaj jave (8 tetor 2025), për të diskutuar mbi projekt-idenë e ndërtimit të një korpusi godinash për sistemimin e Gjykatës dhe Prokurorisë së Apelit.
Mbledhja organizohet vetëm dy ditë pas vrasjes së gjyqtarit të Apelit, Astrit Kalaja. Ai u qëllua në sallën e gjyqit nga Elvis Shkambi, pas dështimit të plotë të masave të sigurisë së godinës.
Burime zyrtare thanë për “Boldnews.al” se ky takim ishte planifikuar javën e kaluar dhe nuk ka lidhje me ngjarjen tragjike të gjyqtarit Kalaja.
Sipas të njëjtave burimeve, rreth një vit e gjysëm më parë është diskutuar mbi detyrën e projektimit për korpusin e ri, në një takim ku morën pjesë përfaqësues të Këshillit të Lartë Gjyqësor, Prokurorisë së Përgjithshme, nga gjykatat dhe prokuroritë e shkallës së parë në kryeqytet, si edhe nga Bashkia e Tiranës.
Paraprakisht është menduar që gjykatat dhe prokuroritë e kryeqytetit të vendosen në godina të reja, që pritet t’i shtohen ndërtesës së Polit të Drejtësisë, ku aktualisht ushtrojnë funksionet Këshilli i Lartë Gjyqësor, Këshilli i Lartë i Prokurorisë dhe Shkolla e Magjistraturës.
Këshilli i Lartë Gjyqësor dhe Prokuroria e Përgjithshme e kanë kërkuar prej vitesh sistemimin e gjyqtarëv dhe prokurorëve të Apelit. Por, nga ana e qeverisë ka pasur shpesh zvarritje. Situata u bë akoma më emergjente pas miratimit të Hartës së Re Gjyqësore, e cila nisi zbatimin në vitin 2023.
Gjykata dhe Prokuroria e Apelit, të cilat deri në atë moment ishin në vështirësi të mëdha për kushte pune, kaluan në një situatë thuajse kolapsi.
Gjyqtarët dhe prokurorët e Apelit në rrethe u vendosën të gjithë në godinën në Tiranë, pas shkrirjes së gjykatave të shkallës së dytë në pesë qytetet kryesore të vendit.
Prej më shumë se dy vitesh, mjediset e Gjykatës së Apelit në Tiranë nuk ngjajnë aspak me një institucion ku shqyrtohen problemet civile e penale të mijëra qytetarëve shqiptarë.
Gjyqtarët dhe administrata gjyqësore e kryejnë pjesën më të madhe të seancave në zyra, pasi numri i pakët i sallave e pamundëson funksionimin normal.
Gjithashtu, ambjentet e brendshme të godinës janë në çdo kohë të përmbytura nga grupe njerëzish, të cilët presin të marrin pjesë në seanca gjyqësore.
Për shkak të kësaj situate të rrëmujshme, edhe shërbimi i ruajtjes fizike e ka thuajse të pamundur kontrollin e plotë ose neglizhon detyrën.
Fatkeqësisht, një situatë e tillë kaotike duket se ka qenë shkaku kryesor i ngjarjes tragjike të kësaj të Hëne (6 gusht), ku mbeti i vrarë gjyqtari Astrit Kalaja.
Sipas dinamikës së ngjarjes, të zbuluar nga Policia e Tiranës, autori i dyshuar, Elvis Shkambi, ka hyrë në ambjentet e gjykatës dhe më tej në sallën e gjyqit i armatosur.
Referuar informacionit policor, rezulton se skaneri i detektimit të metaleve në hyrje të godinës ka pikasur se në trupun e 30-vjeçarit Shkambi ka pasur një pajisje të dyshimtë, megjithatë, roja i sigurisë nuk kishte reaguar dhe nuk kishte marrë masat për kontrollin e mëtejshëm.
