Një 65-vjeçar ka rënë në prangat e policisë, pasi vodhi çantën e një klienti në një lokal në rrugën “Mihal Duri” në Tiranë.
Sipas denoncimit të bërë nga pronari, në çantë ndodhej një shumë e konsiderueshme parash në euro dhe lekë.
Pas njoftimit, shërbimet e Komisariatit nr. 3 u vunë menjëherë në lëvizje dhe identifikuan autorin e dyshuar, shtetasin A. G., 65 vjeç.
Çanta e grabitur u gjet e fshehur në një rrugicë pranë Rrugës së Durrësit.
Njoftimi i Policisë:
Vodhi në lokal, çantën e një klienti, identifikohet dhe kapet menjëherë pas krimit. Gjendet e fshehur në një rrugicë në afërsi të lokalit, çanta me një shumë të konsiderueshme eurosh në të.
Si rezultat i administrimit të menjëhershëm të kallëzimit të një shtetasi, se në një lokal në rrugën “Mihal Duri”, i kishin vjedhur çantën me një shumë eurosh në të, shërbimet e Komisariatit të Policisë Nr. 3 identifikuan dhe kapën autorin e dyshuar të vjedhjes, shtetasin A. G., 65 vjeç.
Gjithashtu, gjetën të fshehur në një rrugicë përgjatë Rrugës së Durrësit, çantën me shumën e eurove, e cila u sekuestrua me cilësinë e provës materiale. Punohet për zbardhjen e vjedhjeve të tjera që mund të ketë kryer shtetasi A. G. Materialet procedurale iu referuan Prokurorisë, për veprime të mëtejshme.
