Partia Demokratike ka denoncuar dy tendera të dyshimtë të zhvilluar nga Drejtoria e Tensionit të Lartë në OSSH sh.a, të cilët sipas opozitës kanë shkelur parimet e transparencës dhe konkurrencës reale, duke çuar në një shpërdorim fondesh prej 7.5 milionë euro.
Zëdhënësja e Antikorrupsionit në PD, Genta Vangjeli, tha se të dy tenderat u zhvilluan në të njëjtën ditë, me të njëjtët ofertues dhe me fitues të njëjtin bashkim operatorësh, duke ngritur dyshime për paracaktim të procesit.
Tenderat e denoncuar janë:
“Ndërtim i linjës 35kV N.St Koplik 220kV – N.St Vukpalaj me dy qarqe”, me fond limit 3 milionë euro;
“Ndërtim i linjës së re 35kV N.St Vukpalaj – Tamare dhe Nënstacion i ri 35/10 kV në Tamare”, me fond limit 4.5 milionë euro.
Sipas PD-së, fituesi i të dy tenderave paraqiti oferta me rreth 98% të fondit limit, duke treguar mungesë konkurrence dhe procese të paracaktuara. Opozita i kërkon institucioneve të fillojnë menjëherë hetimet për këtë rast, që konsiderohet si një tjetër shembull i kapjes së prokurimeve publike nga korrupsioni qeveritar.
Deklarata e plotë
Opozita dhe Partia Demokratike vijojnë të denoncojnë tenderat fiktivë dhe të dyshimtë, që administrata e Edi Ramës zhvillon përmes institucioneve publike, duke i kthyer ato në mekanizma abuzimi me fondet e qytetarëve shqiptarë.
Këtë herë bëhet fjalë për 7.5 milion euro të prokuruara me dy tendera të zhvilluar nga Drejtoria e Tensionit të Lartë në OSSH sh.a, konkretisht:
‘Ndërtim i linjës 35kV N.St Koplik 220kV-N.St Vukpalaj me dy qarqe’ me fond limit prej 3 milionë euro;
‘Ndërtim i linjës së re 35kV N.St Vukpalaj-Tamare dhe Nënstacion i ri 35/10 kV në Tamare’ me fond limit prej 4.5 milionë euro.
Të dy tenderat u zhvilluan në të njëjtën datë, (më 1 shtator), me pjesëmarrje të të njëjtëve ofertues, të cilët u vlerësuan në të njëjtën mënyrë, duke shpallur fitues të njëjtin bashkim operatorësh për të dyja procedurat.
Fituesi i këtyre tenderave paraqiti oferta me vlerë rreth 98% të fondit limit, duke treguar dyshime se nuk ka pasur konkurrencë reale, por procese të paracaktuar.
Kjo pjesëmarrje dhe vlerësimi tregojnë:
mungesën e nxitjes së pjesëmarrjes së operatorëve ekonomikë në prokurimet publike;
mungesën e konkurrencës ndërmjet operatorëve;
rënien e besimit të publikut tek institucionet shtetërore.
Pjesëmarrja e njëjtë, me të njëjtën renditje dhe të njëjtin fitues në procedura të ndryshme, ngre dyshime serioze se autoritetet kontraktore nuk kanë garantuar trajtim të barabartë, jodiskriminues dhe transparent, siç e kërkon ligji për prokurimet publike (LPP), neni 2 dhe neni 3.
Partia Demokratike i bën thirrje organeve përgjegjëse të hetojnë menjëherë këto praktika, që dëmtojnë konkurrencën, deformojnë tregun dhe nuk garantojnë mirëmenaxhimin e fondeve publike.
