Autoritetet kroate kanë bllokuar dhe kthyer mbrapsht një ngarkesë prej 8216 kilogramësh spec djegës të ardhur nga Shqipëria, pasi në to u gjetën mbi normë tre lloje pesticidesh të rrezikshme – Flonicamid, Chlorfenapyr dhe Tebufenpyrad.
Ngarkesa e marrë nga zona e Mollasit dhe Cërrikut të Elbasanit u refuzua dhe u dërgua për asgjësim. Vetëm pasi Kroacia dha alarmin, Autoriteti Kombëtar i Ushqimit (AKU) dhe Krimi Ekonomik shkuan për kontroll në pikën e grumbullimit në Divjakë.
Ky rast ka ngritur sërish pikëpyetje mbi punën e AKU-së, e cila shpesh reagon vetëm pasi skandalet shpërthejnë jashtë vendit.
Në vend që të kontrollohen produktet para se të eksportohen, ngarkesa të tilla kalojnë kufirin, duke dëmtuar imazhin e produkteve shqiptare dhe duke rrezikuar tregjet ku ato shiten.
Problemi me ushqimet në vendin tonë në vend që të ngrejë alarm duket se po normalizohet, kujtojmë se disa javë më parë Kroacia raportoi 4 ton domate nga Berati me pesticide pesë herë mbi normën e lejuar, si dhe 5 ton pjeshkë nga Divjaka me prani të metalit të rëndë nikel.
Problemet nuk ndalen vetëm tek frutat e perimet:
18.3 ton mish pule të importuar nga Brazili u gjetën të kontaminuara me salmonelë në Portin e Durrësit, nga të cilat 13.1 ton u shpërndanë në treg para se AKU të reagonte. Konsumatorët u njoftuan një javë me vonesë, kur një pjesë e madhe e mishit ishte konsumuar.
Qumështi me alfatoksinë: nga 26 mostra të marra këtë vit, 10 dolën pozitive, çka do të thotë se rreth 40% e qumështit në treg ishte përtej normave të sigurisë.
Mandarinat shqiptare, një nga produktet kryesore të eksportit, janë kthyer disa herë mbrapsht nga Kroacia dhe vendet e tjera të BE-së për shkak të pesticideve të rrezikshme si Chlorpyrifos dhe Phosmet. Vetëm këtë vit, 21 ton mandarina u refuzuan në kufi dhe tre persona u arrestuan në Berat, përfshirë edhe një inspektor që kishte lëshuar certifikatë fitosanitare fiktive.
